「登七」肥媽多仔媾拒拍拖：要我啲錢唔使恨跟黑妹巡演激賺過百萬買金保值丨獨家

2024-02-24 07:00

剛「登七」的肥媽(Maria Cordero)跟黑妹(李麗霞)之前到星馬、拉斯維加斯等地開Show，進帳7位數過肥年。中年好搵到的肥媽更醒大家生財貼士，她近年唔再熱捧買磚頭，轉為買實金。另外，喪偶近4年的她被閨密黑妹踢爆有大把「市場」，仲被約去睇日落，但肥媽對黃昏戀冇興趣，「唔要麻甩佬，唔好搞我！」她笑言唔明自己有咩吸引力，更力數自己缺點「脾氣又臭。」咦，肥媽都幾了解自己喎。採訪：方騫平攝影：羅安強

肥媽、黑妹姐好老友，會互相照顧。

肥媽、黑妹姐係靈魂伴侶。

肥媽、黑妹姐好合拍。

肥媽為敖嘉年煮齋湯。

肥媽和黑妹姐龍年大豐收，除賺到過百萬港幣歌酬外，又𢭃到萬元美金利是。講到𢭃利是，肥媽曾有揼心經歷：「有次將利是攝喺胸罅，晾到個心口『腫晒』，哈！我係有料之人先可以晾到成皮嘢，點知跌咗朋友畀嗰個5000蚊籌碼！所以今年孭個鑽石利是袋𢭃利是，萬無一失。」

工作係黑妹精神食糧。

肥媽係性情中人。

黑妹姐最怕退休會好悶。

肥媽話70歲呢個年紀，最重要身體健康。

肥媽上圍可塞入萬元美金利是，就知佢咩料啦！

市道唔好宜買實金

問到投資多年的肥媽如何運用過百萬酬勞？最愛買嘢的她強調邊賺邊使，最緊要開心有得玩：「我請埋啲孫仔、孫女、新抱等去咗拉斯維加斯玩，促進經濟。」她再拋出金句：「唔使係遺產，使嘅叫財產！」另外，肥媽會將剩餘的買實金保值：「𠵱家時勢唔好，買咗33年磚頭，近年物業冇點郁動(升幅)，所以不宜買樓買股票，現金儲蓄都貶值，買黃金放保險箱最好。」她坦言已將最大型的保險箱塞到爆，不過，趁在生時，也會將實金分畀10幾個孫：「善事都做啦，唔介意分畀自己人。」

拉斯維加斯演出時見到吳卓羲。

兩姊妹到雲頂登台時，巧遇金牌司儀阿Bob。

肥媽請咗孫仔、孫女到拉斯維加斯睇表演。

近年肥媽唔再買磚頭。

影一張相跌咗20萬

之前肥媽和黑妹飯局時，有眼利網民發現肥媽旁的手機，屏幕上正開着JPEX Wallet應用程式，指她已墮入JPEX漩渦。肥媽自爆：「乜人都會買過Bitcoin㗎啦！我只係手持一個！嚇到我29萬即刻賣咗，𠵱家升值到近50萬！影一影張食朱古力相就冇咗20萬，唉，但𠵱家唔係再買時候，下次會穩陣啲去銀行買。」

因為呢張相肥媽損失20萬。

肥媽同黑妹姐飯局時無意間影到手機上的JPEX Wallet應用程式。

大把朋友唔會寂寞

喪偶近4年的肥媽及單身多年的黑妹姐直認仍然有大把「市場」，後者更爆前者被約去睇日落，追求者有4個，有由細玩到大，亦有朋友的朋友，肥媽說：「好多仔媾我㗎，但我唔要呀，要嚟仲乜呀咁累贅？我同佢哋講『唔好搞我！唔好玩我！唔好煩我啦。』我連電話都唔聽，我唔要麻甩佬，只係會同啲孫玩。」她解釋：「後生過我話鍾意我，我唔信佢；老過我嘅，服侍完我100分老公之後，我點解仲要搵個人嚟服侍？嗰時我都做到隻『雞』咁啦，唔好搞我！」70歲的肥媽坦言唔知自己有何吸引力，還力數自己缺點：「我脾氣又臭，講嘢又直，身材又冇，如果講錢，要我資源更加唔使恨，你都傻嘅，要我啲錢，不如要我條命算啦，所以唔接受就唔使擔心，我真係唔需要嘛，我忙到死，又有朋友，唔會寂寞。」63歲黑妹姐好同意：「我幾十歲，鍾意我都係傻啦。」肥媽反爆追黑妹「嗰件華人」好長情，她又知道黑妹在加拿大、美國、內地都有追求者。黑妹指𠵱家感情冇壓力，買張機票就行唔使交代，跟肥媽似靈魂伴侶，會互相關心。

肥媽讚先夫係百份百好老公。

肥媽服侍完100分老公之後，不再搵個人嚟服侍。

肥媽曾向游嘉欣自爆好有市場。

肥媽獲「中年好聲音」同學送上驚喜70歲生日會。

另外，問到新一年會否以和為貴，避吓是非？肥媽指好多是非都唔關她的事，如黃家駒事件，就算影到食朱古力相都成熱話：「只係啲人鍾意講我，相士話人紅會多是非，所以越多越好(是非)，我又唔能夠掩住人哋把嘴，反而新一年會有嗰句講嗰句，真係關人忍事！」語畢她大笑補充：「我冇講粗口呀！只係話人哋老公姓關，佢係忍氏咋。」