「登七」肥妈多仔媾拒拍拖：要我啲钱唔使恨跟黑妹巡演激赚过百万买金保值丨独家

2024-02-24 07:00

刚「登七」的肥妈(Maria Cordero)跟黑妹(李丽霞)之前到星马、拉斯维加斯等地开Show，进帐7位数过肥年。中年好搵到的肥妈更醒大家生财贴士，她近年唔再热捧买砖头，转为买实金。另外，丧偶近4年的她被闺密黑妹踢爆有大把「市场」，仲被约去睇日落，但肥妈对黄昏恋冇兴趣，「唔要麻甩佬，唔好搞我！」她笑言唔明自己有咩吸引力，更力数自己缺点「脾气又臭。」咦，肥妈都几了解自己喎。采访：方骞平摄影：罗安强

肥妈、黑妹姐好老友，会互相照顾。

肥妈、黑妹姐系灵魂伴侣。

肥妈、黑妹姐好合拍。

肥妈为敖嘉年煮斋汤。

肥妈和黑妹姐龙年大丰收，除赚到过百万港币歌酬外，又𢭃到万元美金利是。讲到𢭃利是，肥妈曾有揼心经历：「有次将利是摄喺胸罅，晾到个心口『肿晒』，哈！我系有料之人先可以晾到成皮嘢，点知跌咗朋友畀嗰个5000蚊筹码！所以今年孭个钻石利是袋𢭃利是，万无一失。」

工作系黑妹精神食粮。

肥妈系性情中人。

黑妹姐最怕退休会好闷。

肥妈话70岁呢个年纪，最重要身体健康。

肥妈上围可塞入万元美金利是，就知佢咩料啦！

市道唔好宜买实金

问到投资多年的肥妈如何运用过百万酬劳？最爱买嘢的她强调边赚边使，最紧要开心有得玩：「我请埋啲孙仔、孙女、新抱等去咗拉斯维加斯玩，促进经济。」她再抛出金句：「唔使系遗产，使嘅叫财产！」另外，肥妈会将剩馀的买实金保值：「𠵱家时势唔好，买咗33年砖头，近年物业冇点郁动(升幅)，所以不宜买楼买股票，现金储蓄都贬值，买黄金放保险箱最好。」她坦言已将最大型的保险箱塞到爆，不过，趁在生时，也会将实金分畀10几个孙：「善事都做啦，唔介意分畀自己人。」

拉斯维加斯演出时见到吴卓羲。

两姊妹到云顶登台时，巧遇金牌司仪阿Bob。

肥妈请咗孙仔、孙女到拉斯维加斯睇表演。

近年肥妈唔再买砖头。

影一张相跌咗20万

之前肥妈和黑妹饭局时，有眼利网民发现肥妈旁的手机，屏幕上正开着JPEX Wallet应用程式，指她已堕入JPEX漩涡。肥妈自爆：「乜人都会买过Bitcoin㗎啦！我只系手持一个！吓到我29万即刻卖咗，𠵱家升值到近50万！影一影张食朱古力相就冇咗20万，唉，但𠵱家唔系再买时候，下次会稳阵啲去银行买。」

因为呢张相肥妈损失20万。

肥妈同黑妹姐饭局时无意间影到手机上的JPEX Wallet应用程式。

大把朋友唔会寂寞

丧偶近4年的肥妈及单身多年的黑妹姐直认仍然有大把「市场」，后者更爆前者被约去睇日落，追求者有4个，有由细玩到大，亦有朋友的朋友，肥妈说：「好多仔媾我㗎，但我唔要呀，要嚟仲乜呀咁累赘？我同佢哋讲『唔好搞我！唔好玩我！唔好烦我啦。』我连电话都唔听，我唔要麻甩佬，只系会同啲孙玩。」她解释：「后生过我话锺意我，我唔信佢；老过我嘅，服侍完我100分老公之后，我点解仲要搵个人嚟服侍？嗰时我都做到只『鸡』咁啦，唔好搞我！」70岁的肥妈坦言唔知自己有何吸引力，还力数自己缺点：「我脾气又臭，讲嘢又直，身材又冇，如果讲钱，要我资源更加唔使恨，你都傻嘅，要我啲钱，不如要我条命算啦，所以唔接受就唔使担心，我真系唔需要嘛，我忙到死，又有朋友，唔会寂寞。」63岁黑妹姐好同意：「我几十岁，锺意我都系傻啦。」肥妈反爆追黑妹「嗰件华人」好长情，她又知道黑妹在加拿大、美国、内地都有追求者。黑妹指𠵱家感情冇压力，买张机票就行唔使交代，跟肥妈似灵魂伴侣，会互相关心。

肥妈赞先夫系百份百好老公。

肥妈服侍完100分老公之后，不再搵个人嚟服侍。

肥妈曾向游嘉欣自爆好有市场。

肥妈获「中年好声音」同学送上惊喜70岁生日会。

另外，问到新一年会否以和为贵，避吓是非？肥妈指好多是非都唔关她的事，如黄家驹事件，就算影到食朱古力相都成热话：「只系啲人锺意讲我，相士话人红会多是非，所以越多越好(是非)，我又唔能够掩住人哋把嘴，反而新一年会有嗰句讲嗰句，真系关人忍事！」语毕她大笑补充：「我冇讲粗口呀！只系话人哋老公姓关，佢系忍氏咋。」