鄭啟泰逝世丨新城製作紀念特輯！未婚妻王雁芝罕談相識經過：老公，I love you
2024-02-07 20:30 
新城電台DJ鄭啟泰上周六（3日）驚爆死訊，終年56歲。鄭啟泰生前於1988年加入成新城電台DJ，雖然在2023年曾短暫離開，但今年1月再度回巢，可惜最後效力不足一個月便猝逝，實在令人感到欷歔。今日（７日）新城為鄭啟泰製作了《怪你過份美麗》紀念特輯，其未婚妻王雁芝首度開腔憶述二人相識經過，坦言會繼續延續佢嘅快樂，成為Eric 2.0。
相關文章：鄭啟泰逝世丨未婚妻王雁芝連環盡訴不捨之情 憶浪漫往事：有你是我最幸福的事
王雁芝鄭啟泰甜蜜往事：
在節目上，由鄭啟泰生前四個徒弟T-Max、林伽遙、麥皓兒和梁樂童聯合主持，他們坦言：「留咗個位畀，當佢睇緊直播，聽朋友嘅說話。」林伽遙當日有份見證鄭啟泰向女友王雁芝求婚並說：「佢成日讚女友一個好純嘅女仔，相信王雁芝亦深深感受到對男友對佢嘅愛意，肯對佢作出呢個承諾。」王雁芝今次亦有分享昔日與未婚夫的相識經過：「識鄭啟泰嘅朋友都知道，佢係好鍾意整蠱人，呢次真係大整蠱，先求婚，跟住自己走咗去唔理我，好多朋友都話點解妳可以咁堅強，妳要喊就喊喇，我話其實我已經喊完，喊完咪笑番囉，我記得我每次喊，佢都會話：『全世界最醜樣係妳，快啲笑番喇，嚇死人咩』，其實我係畀佢訪問嗰陣認識，一開始對呢個人冇乜好感，亦都唔鍾意佢，又唔打招呼，但係識落再同佢拍拖，覺得呢個人好特別，好識享受人生，佢會開住音樂跳舞掃地，又會帶我去銅鑼灣油站對面，開張枱野餐，亦會自製Menu在我擦牙時貼在窗寫：「Chef Eric’s menu of tonight With unlimited kisses and hearts !( 廚師Eric是日精選 無限個錫錫同心心) ，係咪好浪漫呢！」
王雁芝自覺幸福陪未婚夫走到最後一步
王雁芝亦表示鄭啟泰曾經表明不想結婚：「居然可以令到呢隻冇腳嘅雀仔向我求婚，我仲記得當晚佢同我講『老婆，以後記得叫我做老公喇！』係咪真係估佢唔到。識咗佢呢二年，真係我人生之中最開心，最自在最幸福同最浪漫，我好開心可以識到佢，我係the lucky one and the last one，可以陪佢行到最後一秒，雖然佢已經唔喺度，但係我會繼續延續佢嘅快樂，成為Eric 2.0，繼繼續開心咁生活落去，繼續佢樂觀嘅性格。愛情係人生嘅長跑，但係今次我呢位人生嘅長跑選手，竟然入咗條短跑嘅跑道，可能我哋爆發力太強，愛得太轟烈，但係我相信不在乎天長地久，只在乎長期心裡擁有，I love you鄭啟泰，老公，I love you！」
徒弟之一的林伽遙說：「佢成個family嘅關係都好好，成日讚妹妹，話佢好靚，好多人追，作為肥仔哥哥要保護佢，幫佢擋住啲飛來蜢。我哋初初識佢係做好多晚上節目，後期冇再做嘅原因係為改想多啲時間陪屋企人，喺過去嘅兩年，佢爸爸患上癌症，最後抗癌成功，妹妹出咗一繪本書， 除咗籌款，仲講咗佢哋一家人嘅抗癌歷程。」林伽遙續說：「佢亦都有提到個女，試做帶貨節目，佢都有叫個女幫手，不過唔係因為冇人幫手，只係想多啲同個女相處，畀個女知道爸爸做緊啲乜嘢，等佢見識多啲。」接着其他人亦說：「我哋做節目，佢都會分享下個女去咗邊度留學，佢哋又會一齊去飲酒，又會鼓勵個女拍多啲拖，喺失戀度攞經驗，真係好前衛。」
鄭啟泰妹妹讚哥哥係鄭家嘅驕傲
接着播出鄭啟泰妹妹Fiona的錄音：「相信大家可以估到，有一個好似Eric咁嘅哥哥，作為細妹嘅我，童年一定充滿刺激，佢永遠充滿創意去嚇我、呃我同整古我，我嘅成長簡直係活在莫名奇妙之中，不過同一時間，佢亦照顧我，帶我返學，幫我紥辮、補鞋，煮飯畀我，又保護我，簡直有少少精神分裂。長大後我哋各自追夢但係又一同創作，我自信我哋係世間少有嘅好兄妹。今次真係估唔到，咁瀟洒走咗翔天際，我好似聽到佢最鍾意講嗰句：『得，不過呢啲我唔識，你會幫我搞掂佢！』好，我會做得漂漂亮亮，幫你搞掂佢，你係我哋鄭家嘅驕傲！」
點擊睇藝人悼念鄭啟泰：
薛家燕珍惜鄭啟泰新書
另一方面，與鄭啟泰同樣在新城開咪的薛家燕說：「當我接到鄭啟泰離去消息，我心裡面真係好難過，當晚轍夜難眠，點解咁呢？因為大家做同事已經超過十幾二十年，鄭啟泰畀我哋感覺真係好和藹可親，好幽默，而且好多嘢我哋可以向佢學習，因為佢真係一個好成功，好資深DJ，我記得舊年，佢話會出一本書，叫做『如何七日成日演說高手』，啟泰就話：『家燕姐呀，幫我寫序呀！』」咁我就話：『嘩吓！我點識寫呀！我真係好多嘢要向你學習！』佢就話：『唔係呀，家燕姐，妳有好多方面唔同做法呀嘛！妳幫我寫個序，支持我啦！』我真係幫佢寫咗個序，佢仲送番本書俾我，我攞本書時，佢當然話多謝我，我反而話：『我多謝你呀！』呢本書對我嚟講係好好學習機會，我會好珍惜，慢慢睇。」
家燕姐續說：「佢除咗和藹可親、幽默感之外，佢好鍾意幫助人，當我哋一、兩年前，我哋要做網上直播，乜都唔識，好多時要請教佢點樣做，用咩儀器，佢一一不厭其咁教我哋，佢仲連埋儀器借埋畀我哋用，所以佢係一個好難得、好難得的好DJ，同埋好同事。」她還稱：「記得有一日，因為佢離開咗新城電台成半年，佢突然Whatsapp我同我講：『家燕姐，我可能返嚟同妳做同事呀！』我即刻問係咪真架？我係好開心，所以喺1月30日，我哋一齊拍賀年節目，大家係擁抱，而佢仲話要錫番我一啖，其他同事喺度講笑：『嘩吓，咁我哋咁開心呀！我就話：『係呀，真係好開心，見番鄭啟泰，佢返嚟我哋啲氣氛都開心好多，嗰日我哋仲大家一齊互相恭賀，唉，估唔到突然間收到去世消息，真係好難過、好難過！唯一係感覺安慰，佢唔使受長期病痛之苦就離去，不過，我真係要同啟泰講一聲：我哋真係每一個同事都好懷念您！好難忘記您帶畀我哋嘅歡樂！啟泰，希望您一路好走！主懷安息！我哋永遠懷念您！」
此外，在節目開始前，新城知訊台台長程凱欣表示不少圈中好友包括樂易玲、薛家燕、伍詠薇、姚嘉妮等亦特意以錄音悼念鄭啟泰，事後會將特輯製成光碟送給鄭啟泰的家人作紀念。T-Max表示視對方為師父，讚他為人有義氣，麥皓兒在訪問期間數度聽不住落淚，哽咽表示他是一個好好的大哥哥和前輩，覺得很突然未能接受。新加入的主持梁樂童形容鄭啟泰是第二個爸爸。
其他文章：
鄭啟泰逝世丨《中年好聲音2》悼念故友！曾任旁白報幕工作：好似一家人
鄭啟泰逝世丨未婚妻王雁芝首開腔！原計畫健身影結婚相 死因需解剖釐清籲勿作揣測
鄭啟泰逝世丨未婚妻王雁芝喪夫後首曝光！面容略見憔悴與鄭啟泰妹妹見醫生
-----------------------------
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應