《蜂神惡殺》往死裡打就對了丨頭條戲場

2024-02-07 06:00

全片105分鐘，爽爆快感佔90分鐘，冷場係零，兩個字，好抵睇。Jason Statham飾演已退休的神秘特工組織「養蜂人」Adam Clay，打打殺殺已經唔再關佢事，於遍遠山區養蜂為生，悶但快樂，因為唯一對佢好的鄰居被騙徒呃晒成副身家仲死埋，Adam憤怒了，決定重出江湖為老友報仇。好一個Jason由頭打到尾，仲要不斷往死裡打，大快人心到笑出聲，內心講咗過億次抵死，如果你曾經收過詐騙電話及訊息，甚至被呃過嘅，非常推薦入場。(上映中) 撰文:廖思慧

Adam被迫復出，背後嘅蜜糖非常幫到手。

Adam係神秘特工組織「養蜂人」的前特工，退休後真係去養蜜蜂。

由《自殺特攻：超能暴隊》的David Ayer執導，退休特工Adam 一人單挑詐騙集團，最後發現騙局有強大後台，更牽涉龐大的政、商、黑勢力。打鬥場面非常多樣化，有埋身肉搏又有槍林彈雨，甚至打到油站大爆炸。

Adam鄰居收到防毒軟件過期電郵，因為擔心而上當。

溫馨提示，唔好亂撳LINK同密碼呀。

Adam拎住兩桶火水直闖騙徒巢穴，睇吓個火燒得幾靚。

Adam超勇，一人之力毀滅賊竇。

一把火燒到咁，但仲有千千萬萬個賊竇。

呃晒Adam鄰居錢嘅壞人，下場係手指冇晒仲要連人帶車衝落海。

詐騙者不得好死
電影重點係打同殺，因為Adam的勇猛及唔識死而驚動FBI、CSI及僱傭兵，Adam如人形「攞你命3000」，任何物件拎上手都可以成為致命武器，如電話、鐵鏈同蜂蜜罐，當然拳腳亦非常厲害，動作場面乾淨俐落，冇半秒拖泥帶水，拳拳到肉冇廢話，睇到好爽好紓壓，唔好問點解成班FBI、CSI都打唔贏Adam，咁主角吖嘛，又或者奇怪Adam仲激動過被騙鄰居個女，全片的確好多位唔合邏輯，但一切都唔重要，好好放空大腦，享受Adam點樣用盡各種方法去整死壞人就夠。