亞洲盃直擊｜「食草見紅」事件勁爭議 伊拉克補時輸兩粒 約旦入8強多謝球證？
2024-01-30 00:15 
周一晚亞洲盃16強繼續爆冷，約旦於補5及7分鐘入波，以3：2反勝伊拉克，打入8強。但伊拉克神鋒艾文侯賽因入波後「食草」慶祝，換來第2張黃牌被逐，成為勝負關鍵及引起好大爭論，有球迷更指球證好有問題。
前一日塔吉克憑互射12碼淘汰阿聯酋，已經係一個冷門，顯示西亞三線球隊大有進步；約旦再次印證這個現象，塔吉克及約旦晉級後，正正會於8強碰頭。
伊拉克賽前被睇好，雖然45分落後在先，蘇特拿迪基68分鐘扳平1:1。皇牌前鋒艾文侯賽因76分鐘，取得今次賽事個人第6個入球，令伊拉克反先2:1。
入波之後，艾文侯賽因坐在地上，作出拿草放入口食的動作，卻被球證以過份慶祝、拖延時間為由，發出艾文侯賽因今仗第2張黃牌，兩黃變一紅被逐。
有冇過份慶祝，好難有客觀標準，約旦球員入波後亦有作類似動作，所以唔單止伊拉克球員憤怒，亦有網民指球證決定離譜。
約旦打多個，最後階段發動瘋狂攻勢，終於在95及97分鐘破門，以3：2贏出這場極具爭議性賽事。
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應