亞洲盃直擊｜實力已強過你 仲要「高」一截 澳洲炸冧印尼 8強對南韓或沙特
2024-01-28 22:33 
【吳家祺卡塔爾直擊】亞洲盃決賽周16強階段，香港時間周日晚上開始，打頭陣的澳洲憑藉身高優勢，90分鐘內以4:0解決印尼，率先成為8強隊伍。
澳洲今場在賈西姆本哈馬德體育場惡鬥印尼，現場天氣一流，陽光燦爛，配合澳洲著鮮黃色波衫，加埋印尼亦著紅衫，現場色彩耀眼，睇得非常爽。
澳洲教練格拉咸阿諾派出科拿路利、馬田保爾及保斯三箭齊發，明擺當對手冇到。印尼南韓籍教練申台龍曾帶領南韓參加2018世盃決賽，今仗以出生於荷蘭的守將帕蒂納馬（20號），以及另一亦是荷蘭出生、効力荷乙海牙的前鋒史特魯克（11號）為主力。
澳洲有個伊巴謙莫域
賽前普遍睇好澳洲，實力高一班，現場睇見兩隊陣容，更加覺得印尼冇得揮，特別係身高，澳洲球員真係高好多，平均相差目測約10cm，結果亦如此，澳洲今仗3個士哥，都來自高空攻勢。
開波12分鐘，澳洲已藉對手擺烏龍先開紀錄，馬田保爾45分鐘頂成2:0完半場。去到89及91分鐘，澳洲再靠兩個高空攻勢，先有22號中場積臣艾雲飛頂被擋，隊友葛雲補入，之後再有李斯特城後衛蘇達頂入，將紀錄改寫成4:0完場。
計踢法澳洲實而不華，但陣中22號中場積臣艾雲，外型極具星味，現場睇十足十伊巴謙莫域，不過佢係防守型球員，効力德乙球隊聖保利。
澳洲晉級8強後，將鬥南韓及沙特阿拉伯一役的勝方，這場賽事將係奇連士文及文仙尼兩位名帥交手，被視為16強最有睇頭一仗，賽事將在周三凌晨零時上演。
亞洲盃16強秩序
日期 對賽 香港時間
1月28日(日) 澳洲4:0印尼
1月29日(一) 塔吉克對阿聯酋 凌晨0時
1月29日(一) 伊拉克對約旦 晚上7時30分
1月30日(二) 卡塔爾對巴勒斯坦 凌晨0時
1月30日(二) 烏茲別克對泰國 晚上7時30分
1月31日(三) 沙特阿拉伯對南韓 凌晨0時
1月31日(三) 巴林對日本 晚上7時30分
2月1日(四) 伊朗對敘利亞 凌晨0時
--
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應