獨家丨泳兒告別柔弱勢要操出靚腹肌　2024年目標換車換樓英國開騷

2024-01-17 07:00

泳兒推出祝福第3部曲《無能為力》，講述將被睇低的力量傳化為動力。泳兒認為人生難免有無力感，這幾年做暗黑糸列遇到樽頸位的她，預告今年會有不少新搞作，包括身形也會升呢。至於新年願望，泳兒好實際，希望能換車換樓，更想到英國開騷。採訪：杜杜攝影：羅安強

泳兒雖然恨搵真銀，但農曆年都希望去旅行放鬆，回來再搏殺。

泳兒的祝福系列會將負面詞變正面，今次《無能為力》都不例外，「人哋話你冇能力，你就將呢種被睇低嘅負能量轉化為力量，話畀人聽你係有能力。」她經常遇到無力感，由早年媽媽突然入院，到2017年突然失聲，做「暗黑系列」也遇上樽頸位，「有啲comment會質疑我，『泳兒仲可以有啲乜嘢畀大家睇？係咪已經盡咗？』」

《無能為力》MV有大量電影級CG畫面，泳兒力推大家要細睇。

音樂身形齊升呢

為了衝破樽頸位，泳兒預告今年在音樂上再有新嘗試，「我睇騷時見到啲音樂人或者單位，會主動邀請合作，佢哋可能唔係做緊啲pop嘅嘢，所以只係初步構思，未知可以點合作。」連造型上泳兒也會有新突破，所以會勤做運動改善身形，「希望好似韓劇《Sweet Home》女主角李施昤咁，當然冇佢咁勁，但可以多少少肌肉，想有啲腹肌睇吓，我因為太瘦成日有啲假腹肌，希望音樂同身形上都要升呢，成日畀人感覺好柔弱，同我性格有啲反差。」

泳兒雖然瘦，但屬有料之人，健埋身應該幾有睇頭。

41歲生日獲大批粉絲開派對慶祝，令泳兒好感動。

踏入新一年，泳兒最大心願是換車換樓，「我揸得太多，所以想換架電車，慳啲油錢，同埋換過間屋，因為欠缺雜物房，托賴今年收到好多禮物，搞到間房變咗雜物房。」所以她今年要努力搵錢，「暫時不能，希望嚟緊會有財力啦！哈哈！」去年尾去過洛杉磯演出的她，下個目標想到倫敦，「好鍾意呢個地方，去過旅行又探過朋友，但係未喺嗰度開過騷，見到好多歌手去過，好羡慕呀！」