TWINS宣佈終極加場 破紀錄14場寓意一生一世

一加再加三加！《TWINS SPIRIT SINCE 2001 LIVE IN HONG KONG》，今日再宣佈加開終極第13及14場，相隔9年先再開紅館， 世界各地歌迷非常掛念，瘋狂搶飛是場場開場場爆主因，但一加再加，加到12場時，歌迷既開心又開始擔心，瘋傳「佢哋係咪好似Blackpink咁，做埋今次就解約？解散？係咪想生仔退休？咁搏命，唔好呀.......」非常多幻想。

加開13、14場，寓意TWINS精神是一生一世。

今次第三度加場，TWINS兩人異口同聲喊出: 「嘩！今次真係破晒紀錄！14場！做完真係可以好似歌迷傳言咁光榮引退啦！哈哈哈！」工作人員叫兩人咪講笑，阿Sa先笑道，「哈哈哈.....咁佢哋真係私信問我哋，係咪想解散嘛，哈哈哈，笑死，我哋依家加第13、14場，1314一生一世啊！Twins就算退休都唔會解散，我哋係一生一世嘅好隊友，TWINS  SPIRIT係會長存。破晒紀錄做咁多場，唔係唔俾我哋農曆年「退」下來「休」息一下呀？哈哈哈，放個長少少假都得掛，哈哈。」

二人希望今次演唱會可以繼續有握手位。

阿嬌:  「係囉，1314，我哋都係一生一世！哈哈，公司話係雙喜終極加場啦，歌迷應該最開心，因為我同阿Sa為大家爭取到，九成飛放出街賣！今次應該唔會再收到留言話買唔到，求票等等啦？大家千萬咪去炒黃牛，等買加場啦，我又可以有飛補少少朋友債啦。」為演唱會排練及keep fit ，阿嬌表示今次自己好醒，「我已經學好晒啦(舞步)，個人又瘦番，嘻嘻。各方面都進行得好好，所以對今次演唱會好有信心，大家一齊期待啦。」阿Sa就話，「其實我由第一次開紅館，到今時今日，我每一次都當係最後一次咁做。好珍惜上台同大家相聚機會，希望全力以付，做到最好俾大家啦。不過今次就有一個仍未解決到問題，就係咁多年來我哋演唱會都有握手位，今次我哋都好想有，因為好耐冇見歌迷，但係公司就出現好多反對聲音囉，佢哋好擔心我哋今次做14場咁多，驚我哋唔好好保護自己，近矩離接觸咁多人會容易病，我同阿嬌依家都諗緊，點樣可以有一個握到手又安全的方式去解決呢個問題，等歌迷又開心，我哋又開心，大家有咩提議？可以留言話我哋知。」

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ