古天后日誌｜恒指回吐後抽仍有望重返萬七水平

12月18日，大致多雲，日間短暫時間有陽光，今晚有一兩陣微雨。上周聯儲局議息維持利率不變，不過會後鮑爺放鴿，暗示加息周期已告一段落，並可以開始討論何時減息，刺激美股上周繼續做好。道指連日創新高，標指跟納指亦逼近歷史高位。展望呢個星期，市場焦點會係美國經濟數據，較為重要係周五嘅美國11月個人消費開支指數(PCE)。市場預期，名義PCE按月沒變動，核心PCE則升0.2%。

除咗PCE外，美國本周公布嘅消費者信心指數、上周首次申領失業救濟人數、耐用品訂單、二手房屋銷售指數、新屋銷售等數據，同樣具有參考價值。至於另一個焦點，係聖誕老人升市（Santa Claus rally）會否出現。道指上周五創下收市紀錄新高。標指雖然幾乎無變動，但美股連升七個星期，已經係自2017年以來最長升市。

此外，明日為日本央行議息，雖然市場普遍認為今次日央行唔會突然收緊已推行多年嘅寬鬆貨幣政策，但早前已作為暗示，明年或開始結束多年寛鬆貨幣措施。

至於港股呢邊，上周五喺美股盤中下滑之際，ADR及夜期隨其下跌，回落至16700水平，但及至今早亞洲時段，道指期貨已見回升，但黑期未有跟隨，繼續喺16700水平徘徊，較上周五收市跌逾百點。喺過去一個星期，恒指於上周一再創下15972今年新低，但當日跌幅收窄，其後幾日開始築底，並於上周五升至16792點收市，按周回升458點或2.8%。以強勢指數（RSI）以論，港股暫時只係嚴重超賣下反彈，勢頭上未見明顥轉變，仍然由淡友主導，但從恒指日線及周線圖顯示，本月或有望出現V型反彈。

上周五恒指以裂口高開突破5日（16399）及10日線（16411），走勢上明顯有改善，而恒指成份股喺當日出現九成上升，只有一成下跌，係上月20日以嚟首次出現，加上當日成交額喺未有任何指數rebalancing下達到1362億元，成交明顯有改善。而今日料5日線可升穿10日線，出現第一個黃金交叉，並出現短期見底訊號，為本月出現V型反彈提供潛在機會。

只不過中港股市目前仍然面對成交薄弱，未見新資金流入問題，加上周五晚夜期及ADR表現強差人意，預期港股今早再度低開。恒指小時圖形成頭肩底形態，上周已順利升穿頸線位16600水平，今日回吐後抽能守於此水平之上，量度升幅可重返17200至300水平，正好係目前正下移嘅50日線（17279）之所在。

---
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ