獨家丨許廷鏗澄清欣宜冇抑鬱呼籲對方做嘉賓被批唔夠「歌神」紅館騷抵睇靠市集搶分

2023-12-18 07:00

許廷鏗(Alfred)成為獨立歌手後自組公司兩年，表現進取，繼去年底自資在九展開新年倒數演唱會後，今年平安夜至boxing day亦舉行三場處男戶外騷回饋fans，由午後開始，場內更附設市集，供歌迷買住嘢等睇Show，幫手振興香港經濟。對於被評門票$980偏貴，貼近「歌神」張學友票價，投資過百萬的Alfred有解釋，原因亦用心良苦。至於瘋傳鄭欣宜將做表演嘉賓，Alfred表示唔肯定，但就恨到出口：「佢唔嚟會有少少唔慣，不過，唔好迫佢，佢唔迫得。」更強調老友抑鬱之說是傳聞。採訪：方騫平

許廷鏗指做藝人較被動，要為自己爭取機會，所以投資過百萬開Show。

許廷鏗重視安全感。

許廷鏗之前氣管敏感，要調理好身子。

許廷鏗公司成立兩年，業績唔差。

許廷鏗期待處男戶外騷。

《「SANTA JAMBOREE音楽生活祭」，許廷鏗 LIVE 2023》於西九竹翠公園舉行，Alfred今次挑戰戶外場地，體力付出更多，尤其有part跳住唱：「以前跳舞會帶來喜感，今次秘密練兵，希望大家一齊歡笑，而唔係俾人笑。」今次個唱斥資百萬，由Alfred自導自演，不懂控制成本嘅Alfred自嘲好渣：「正常開騷用嚟賺錢，但我嘅成本同製作金額往往不成比例，所以只能盡力去做，唯有當作年尾歌迷大聚會，值得花多少少去回饋支持者，開心冇得用錢嚟衡量。同時，要主動出擊為自己製造一啲機會。」他堅持唔好太著眼金錢，否則做唔到心中嘅理想演唱會。

Alfred自組公司後大膽舉行處男戶外騷。

Alfred為戶外騷努力健身，增強體魄。

Alfred之前去日本浸溫泉，率先晒吓苦練的身形。

Alfred成為獨立歌手後，去年底自資在九展開新年倒數演唱會。

市集唔收入場費

對於門票$980惹來批評聲音，相比「歌神」《張學友60+巡迴演唱會香港站》票價僅平得三「嚿」水，他即解畫：「大家睇完就知我係平，坦白講，其實我冇收市集食店嘅場租，只想喺聖誕節，提供一個平台畀特色小食店有多啲人認識，開心Share我喜歡嘅口味，大家開心之餘賺到少少錢，皆大歡喜。」他自量唔可以跟學友比較：「我睇過學友個唱幾次，佢不遺餘力演出，票價$1280真係抵睇，要向佢學習。」他自爆2019年3月開紅館個唱前，曾睇《學友經典香港站》取經被嚇親：「見佢咁厲害，跟同行嘅胡鴻鈞講『死喇！幾個月後到我喺同一個場館開騷，我唔係呢個水準喎！』嗰次真係令我大開眼界，親身體會到天王開紅館騷係值回票價，因為佢哋嘅功藝用咗多年時間煉成。」既然及不上學友，Alfred笑言唯有用周邊嘢幫手搶分，如市集唔收入場費，他重申：「其實去年睇過我騷嘅觀眾都唔會失望而回，至少歌曲數量一定夠，我有能力會盡唱。」

《張學友60+巡演》叫好叫座。

2019年開紅館個唱前曾睇《學友經典香港站》取經。

跟胡鴻鈞同屬巨星幫出身。

被屈唔開心瞓晒冇晒事

至於「神隱」半年嘅鄭欣宜會否「上水」擔任表演嘉賓？Alfred有跟欣宜提過做騷：「佢做表演嘉賓當然好，但唔確定，希望佢嚟撐我。不過，我冇方法叫到佢一定要嚟，佢要嚟自然會嚟，就算唔嚟都會體諒，畀啲時間佢休息，佢準備好自然會話我知，正如拍《一場同學》MV前，佢都一視同仁冇回覆，係佢主動搵返我，提出久休現身前先幫我拍MV。」對於欣宜抑鬱之說，Alfred稱是傳聞：「佢之前咁努力做好作品，喺樂壇取得佳績，需時調整及休息好正常，於外國休息半年好普遍，見佢狀況ok。」但Alfred並冇否認欣宜處於沉澱期，有思考前途問題：「正如我公司營運咗2年都會計算收支平衡。」Alfred自爆曾不甘被屈會唔開心：「慶幸一覺瞓醒就冇事，其實每個人都需要空間，我同佢都唔係好迫得，迫得太緊只會適得其反。」另外，對於4年抱4嘅張致恒受人生「第一次」蛀牙困擾，在IG發文求贊助，對此，副業是牙醫的Alfred笑住質疑：「點會人生『第一次』蛀牙呀？我唔揀客嘅，睇吓佢乜情況先啦，如果全棚牙就贊助唔到喇，收平啲就可以嘅。」