独家丨许廷铿澄清欣宜冇抑郁呼吁对方做嘉宾被批唔够「歌神」红馆骚抵睇靠市集抢分

2023-12-18 07:00

许廷铿(Alfred)成为独立歌手后自组公司两年，表现进取，继去年底自资在九展开新年倒数演唱会后，今年平安夜至boxing day亦举行三场处男户外骚回馈fans，由午后开始，场内更附设市集，供歌迷买住嘢等睇Show，帮手振兴香港经济。对于被评门票$980偏贵，贴近「歌神」张学友票价，投资过百万的Alfred有解释，原因亦用心良苦。至于疯传郑欣宜将做表演嘉宾，Alfred表示唔肯定，但就恨到出口：「佢唔嚟会有少少唔惯，不过，唔好迫佢，佢唔迫得。」更强调老友抑郁之说是传闻。采访：方骞平

许廷铿指做艺人较被动，要为自己争取机会，所以投资过百万开Show。

许廷铿重视安全感。

许廷铿之前气管敏感，要调理好身子。

许廷铿公司成立两年，业绩唔差。

许廷铿期待处男户外骚。

《「SANTA JAMBOREE音楽生活祭」，许廷铿 LIVE 2023》于西九竹翠公园举行，Alfred今次挑战户外场地，体力付出更多，尤其有part跳住唱：「以前跳舞会带来喜感，今次秘密练兵，希望大家一齐欢笑，而唔系俾人笑。」今次个唱斥资百万，由Alfred自导自演，不懂控制成本嘅Alfred自嘲好渣：「正常开骚用嚟赚钱，但我嘅成本同制作金额往往不成比例，所以只能尽力去做，唯有当作年尾歌迷大聚会，值得花多少少去回馈支持者，开心冇得用钱嚟衡量。同时，要主动出击为自己制造一啲机会。」他坚持唔好太著眼金钱，否则做唔到心中嘅理想演唱会。

Alfred自组公司后大胆举行处男户外骚。

Alfred为户外骚努力健身，增强体魄。

Alfred之前去日本浸温泉，率先晒吓苦练的身形。

Alfred成为独立歌手后，去年底自资在九展开新年倒数演唱会。

市集唔收入场费

对于门票$980惹来批评声音，相比「歌神」《张学友60+巡回演唱会香港站》票价仅平得三「嚿」水，他即解画：「大家睇完就知我系平，坦白讲，其实我冇收市集食店嘅场租，只想喺圣诞节，提供一个平台畀特色小食店有多啲人认识，开心Share我喜欢嘅口味，大家开心之馀赚到少少钱，皆大欢喜。」他自量唔可以跟学友比较：「我睇过学友个唱几次，佢不遗馀力演出，票价$1280真系抵睇，要向佢学习。」他自爆2019年3月开红馆个唱前，曾睇《学友经典香港站》取经被吓亲：「见佢咁厉害，跟同行嘅胡鸿钧讲『死喇！几个月后到我喺同一个场馆开骚，我唔系呢个水准喎！』嗰次真系令我大开眼界，亲身体会到天王开红馆骚系值回票价，因为佢哋嘅功艺用咗多年时间炼成。」既然及不上学友，Alfred笑言唯有用周边嘢帮手抢分，如市集唔收入场费，他重申：「其实去年睇过我骚嘅观众都唔会失望而回，至少歌曲数量一定够，我有能力会尽唱。」

《张学友60+巡演》叫好叫座。

2019年开红馆个唱前曾睇《学友经典香港站》取经。

跟胡鸿钧同属巨星帮出身。

被屈唔开心瞓晒冇晒事

至于「神隐」半年嘅郑欣宜会否「上水」担任表演嘉宾？Alfred有跟欣宜提过做骚：「佢做表演嘉宾当然好，但唔确定，希望佢嚟撑我。不过，我冇方法叫到佢一定要嚟，佢要嚟自然会嚟，就算唔嚟都会体谅，畀啲时间佢休息，佢准备好自然会话我知，正如拍《一场同学》MV前，佢都一视同仁冇回覆，系佢主动搵返我，提出久休现身前先帮我拍MV。」对于欣宜抑郁之说，Alfred称是传闻：「佢之前咁努力做好作品，喺乐坛取得佳绩，需时调整及休息好正常，于外国休息半年好普遍，见佢状况ok。」但Alfred并冇否认欣宜处于沉淀期，有思考前途问题：「正如我公司营运咗2年都会计算收支平衡。」Alfred自爆曾不甘被屈会唔开心：「庆幸一觉瞓醒就冇事，其实每个人都需要空间，我同佢都唔系好迫得，迫得太紧只会适得其反。」另外，对于4年抱4嘅张致恒受人生「第一次」蛀牙困扰，在IG发文求赞助，对此，副业是牙医的Alfred笑住质疑：「点会人生『第一次』蛀牙呀？我唔拣客嘅，睇吓佢乜情况先啦，如果全棚牙就赞助唔到喇，收平啲就可以嘅。」