星8卦｜「矮人」恃靚仔專食人妻爛賭得罪「阿太」失靠山

2023-12-19 11:30

見到「矮人」就唔開胃，係！閣下的確幾靚仔，問題係生得矮呢，咁仲可以出到位，真係你做咗幾多好事至有咁好運氣！或者又可以咁講娛樂圈已經一年不如一年，以前嘅明星氣質喺今日嚟講係絕響。

「矮人」雖然攞咗冠軍，但運氣始終麻麻，係好唱得，未遇到伯樂就無計。直到「阿太」喺一次演出對佢生滋貓入眼，決定出手同佢公司講數，拎咗成七位數話要捧紅佢。公司梗好㗎，有大水喉射住咪幫佢落力做，果然係無乜人材情況下，「矮人」憑住精緻五官同正常嘅表現，漸漸俾人接受。可惜人嘅質素唔得，有「阿太」照顧令佢無後顧之憂，憑住名氣周圍溝女，最喜歡食人妻，話無手尾，結果太多女俾佢食過，一兩個唔生性，就會揚晒出嚟，花心形象令佢扣咗啲分，但今時今日粉絲又唔係太介意。

最緊要令「阿太」決定唔再照顧佢嘅原因，唔係因為食女太多，自己都有老公，玩吓又有乜所謂，而係有錢之後，「矮人」回復以前嘅本性，成日過大海，又賭啲唔見得光嘅遊戲，總之有得賭連自己姓乜都唔記得。短短一兩年間，「矮人」輸咗幾百萬，全部由「阿太」埋單，由當初喊晒要「阿太」幫到最近非找不可，「阿太」知道多多錢都唔夠佢輸，主動劃清界線自保，睇吓「矮人」靠自己搵嘅去賭可以撐幾耐！