獨家丨陳偉霆自揭負評致抑鬱怪行嚇親阿媽林超賢欣賞新拍檔有熱情做乜都得

2023-12-13 07:00

38歲的陳偉霆（William）在內地超紅，名成利就的他，原來曾被負評搞到抑鬱，試過離家出走，甚至因為唔想見到自己個樣而拆走廁所塊鏡，以上經歷竟有助他在《爆裂點》中更投入演卧底。而第6次跟張家輝合作的林超賢導演，已視對方為自己的代言人，讚好新拍檔William之餘，更自爆拍戲最怕遇到一類人。採訪：杜杜攝影：羅安強造型:Charlie Chin、assisted by Loby Lee(陳偉霆) 髮型:Davy　Yu@AdmiXHairStyling(陳偉霆)化妝:Angel Y(林超賢)、Khaki yan(陳偉霆) 服飾:Dsquared Leather jacket、Neil Barrett Cargo pants場地:英皇駿景酒店

林導和William初次合作又互相欣賞，好快變得好投契。

William初出道時，曾被負評影響情緒。

10年沒拍港產片的林導，能夠在港取景特別開心，就算作品以三級上映亦不介意，「三級咪三級，又唔係賣弄，只係人物嘅悲哀，現實嘅殘酷！」講到第6次跟張家輝合作，他以戰友形容兩人關係，「好多時一諗角色，就覺得佢係張家輝，返嚟拍香港片，佢根本係我代言人。」

相隔多年再拍港產片，林導坦承心情特別興奮。

林導跟William一講起角色，興奮到滔滔不絕。

演打波戲日操10幾粒鐘

林導跟新拍檔William在多年前已認識，「佢對拍戲個追求好熱情，坦白講『我咩都得㗎』，最緊要係呢樣嘢，最怕嗰啲咩都唔得，哈哈！同埋都希望我嘅戲有啲新演員。」而William首度跟「魔鬼導演」合作亦早有心理準備，「導演冇發過一次脾氣，亦冇強迫一定要咁樣做！」而所有危險動作，亦做足安全措施，令他好放心，「唔係好魯莽咁叫你跳落嚟，又有好好嘅醫療團隊喺隔離準備，武師做好晒安全措施，試完畀你，觀察你得唔得，唔得就替身做。」

林導口中「咩都得」的William，動作戲都親身上陣。

William在戲中演卧底「江銘」，唔需要操到太大隻，但對身形仍有要求，「要乾身，冇啖好食嘅感覺，只要維持正常運動量。」其中一場幾分鐘的打speed ball戲，林導冇特別要求，但他仍花了3個月時間苦練，每日打足10幾個鐘，他認為準備功夫做多好過做少，「唔想導演、家輝哥失望，呢個機會好難得，10幾年前出道有電影拍嘅時候，一路望住呢班前輩，會諗有冇機會喺裹面做一個角色，放喺心太耐，當導演話畀機會我，唔想衰畀佢哋睇。」

William為令角色身形似「冇啖好食」下了不少功夫。

William苦練打speed ball，不想導演有額外要求時做唔到。

同張家輝傾偈超多得着

另外，William初跟張家輝合作令他大開眼界，除提議他要求林導示範如何演繹外，也啟發了新思維，「佢喺現場入咗自己世界，每分每秒都諗緊角色應該點做。」William越講越開心，因為冇諗過跟家輝傾吓偈就「袋到錢落袋」，「喺架車問佢，嗰場戲諗唔到點做喎，佢話『其實我冇得教你㗎喎，好似執中藥咁，啲藥啱我啫，擺落你身體可能會排斥』，啟發咗我太多嘢。」他獲「張老師」提點後，嘗試為自己「執藥」，「成日喺現場見到家輝哥點『執藥』，原來我同自己傾偈唔夠多，每次都累積經驗。」

William能近距離觀察影帝工作情況，過程十分享受。

跟影帝張家輝合作，令William獲益良多。

William又指最初找不到共同點演「江銘」，後來發覺角色，跟10多年前初入行的自己好相似，「好多人同你講『咁樣唔得喎』，解釋唔到畀佢哋知，或者同身邊人講『你信我啦』。」原來他當年曾被負評打沉，自我認同感很低，情緒問題困擾了兩年，跟家人的關係亦受影響，「最嚴重係唔想望到自己，廁所塊鏡都拆咗，又唔想屋企人擔心，我太錫阿媽，但係佢成日望到我呢個樣，唔想畀佢望咪離家出走囉，唔好搵到我，嗰段時間我係衰到咁。」公司知唔知呢？「公司好多藝人，除非你好大件事，好坦白講，你唔得咪下個囉！」他坦認負評一直沒停過，全靠自己變強企返起身，「年紀慢慢大，經歷咗咁多嘢，心裹面嘅聲音知道自己想要啲乜，反而行得舒服好多。」問William會否想拍齣好戲爭返啖氣？成熟了的他想法亦改變，「幾年前都話想拍套好戲畀鬧我嘅人，去到𠵱家唔係！我係好享受，拍到佢（林導）嘅戲已經願望成真，又俾我睇到影帝係點樣演戲，有好多得着。」

$2006年，William跟張致恒及麥子豪組男團Sun Boy\'z出道。$