独家丨陈伟霆自揭负评致抑郁怪行吓亲阿妈林超贤欣赏新拍档有热情做乜都得

2023-12-13 07:00

38岁的陈伟霆（William）在内地超红，名成利就的他，原来曾被负评搞到抑郁，试过离家出走，甚至因为唔想见到自己个样而拆走厕所块镜，以上经历竟有助他在《爆裂点》中更投入演卧底。而第6次跟张家辉合作的林超贤导演，已视对方为自己的代言人，赞好新拍档William之馀，更自爆拍戏最怕遇到一类人。采访：杜杜摄影：罗安强造型:Charlie Chin、assisted by Loby Lee(陈伟霆) 发型:Davy　Yu@AdmiXHairStyling(陈伟霆)化妆:Angel Y(林超贤)、Khaki yan(陈伟霆) 服饰:Dsquared Leather jacket、Neil Barrett Cargo pants场地:英皇骏景酒店

林导和William初次合作又互相欣赏，好快变得好投契。

William初出道时，曾被负评影响情绪。

10年没拍港产片的林导，能够在港取景特别开心，就算作品以三级上映亦不介意，「三级咪三级，又唔系卖弄，只系人物嘅悲哀，现实嘅残酷！」讲到第6次跟张家辉合作，他以战友形容两人关系，「好多时一谂角色，就觉得佢系张家辉，返嚟拍香港片，佢根本系我代言人。」

相隔多年再拍港产片，林导坦承心情特别兴奋。

林导跟William一讲起角色，兴奋到滔滔不绝。

演打波戏日操10几粒钟

林导跟新拍档William在多年前已认识，「佢对拍戏个追求好热情，坦白讲『我咩都得㗎』，最紧要系呢样嘢，最怕嗰啲咩都唔得，哈哈！同埋都希望我嘅戏有啲新演员。」而William首度跟「魔鬼导演」合作亦早有心理准备，「导演冇发过一次脾气，亦冇强迫一定要咁样做！」而所有危险动作，亦做足安全措施，令他好放心，「唔系好鲁莽咁叫你跳落嚟，又有好好嘅医疗团队喺隔离准备，武师做好晒安全措施，试完畀你，观察你得唔得，唔得就替身做。」

林导口中「咩都得」的William，动作戏都亲身上阵。

William在戏中演卧底「江铭」，唔需要操到太大只，但对身形仍有要求，「要乾身，冇啖好食嘅感觉，只要维持正常运动量。」其中一场几分钟的打speed ball戏，林导冇特别要求，但他仍花了3个月时间苦练，每日打足10几个钟，他认为准备功夫做多好过做少，「唔想导演、家辉哥失望，呢个机会好难得，10几年前出道有电影拍嘅时候，一路望住呢班前辈，会谂有冇机会喺裹面做一个角色，放喺心太耐，当导演话畀机会我，唔想衰畀佢哋睇。」

William为令角色身形似「冇啖好食」下了不少功夫。

William苦练打speed ball，不想导演有额外要求时做唔到。

同张家辉倾偈超多得着

另外，William初跟张家辉合作令他大开眼界，除提议他要求林导示范如何演绎外，也启发了新思维，「佢喺现场入咗自己世界，每分每秒都谂紧角色应该点做。」William越讲越开心，因为冇谂过跟家辉倾吓偈就「袋到钱落袋」，「喺架车问佢，嗰场戏谂唔到点做喎，佢话『其实我冇得教你㗎喎，好似执中药咁，啲药啱我啫，摆落你身体可能会排斥』，启发咗我太多嘢。」他获「张老师」提点后，尝试为自己「执药」，「成日喺现场见到家辉哥点『执药』，原来我同自己倾偈唔够多，每次都累积经验。」

William能近距离观察影帝工作情况，过程十分享受。

跟影帝张家辉合作，令William获益良多。

William又指最初找不到共同点演「江铭」，后来发觉角色，跟10多年前初入行的自己好相似，「好多人同你讲『咁样唔得喎』，解释唔到畀佢哋知，或者同身边人讲『你信我啦』。」原来他当年曾被负评打沉，自我认同感很低，情绪问题困扰了两年，跟家人的关系亦受影响，「最严重系唔想望到自己，厕所块镜都拆咗，又唔想屋企人担心，我太锡阿妈，但系佢成日望到我呢个样，唔想畀佢望咪离家出走罗，唔好搵到我，嗰段时间我系衰到咁。」公司知唔知呢？「公司好多艺人，除非你好大件事，好坦白讲，你唔得咪下个罗！」他坦认负评一直没停过，全靠自己变强企返起身，「年纪慢慢大，经历咗咁多嘢，心裹面嘅声音知道自己想要啲乜，反而行得舒服好多。」问William会否想拍出好戏争返啖气？成熟了的他想法亦改变，「几年前都话想拍套好戏畀闹我嘅人，去到𠵱家唔系！我系好享受，拍到佢（林导）嘅戏已经愿望成真，又俾我睇到影帝系点样演戏，有好多得着。」

$2006年，William跟张致恒及麦子豪组男团Sun Boy\'z出道。$