獨家丨趙希洛輕鬆解畫:佢唔會嬲 離巢TVB感謝文漏多謝樂小姐
2023-12-11 07:00 
今年9月，有TVB「御用癲婆」之稱的趙希洛離開工作咗15年嘅「娘家」，她感激獲TVB愛錫，疫情下可以拍《開心速遞》、畀女配獎及創作角色空間，不過密集式工作3年，係時候要放長假去增值自己，唔想「交行貨」，未來她會多方面發展，以YouTube有175萬訂閱的Coffee(林芊妤)為目標強攻社交平台，甚至拍電影、唱吓聖誕歌，發展唔同路向。採訪：方騫平 場地：Le Chefeteria
外闖3個月見世面的趙希洛，坦言好舒服，因為之前劇接劇，最高紀錄一日要轉4個造型，長期冇休息，有被榨乾、缺氧嘅感覺，加上對自己要求高要做到最好，好怕重覆角色欠缺新鮮感，係時候要唞一唞。
袋住家人「安全卡」
因此，回復自由身後馬上到美國及法國體驗，認識當地戲劇文化：「尤其參觀拍攝美國最高收視劇集嘅錄影廠；又見到用嚟拍戲，球場咁大，附設人造浪嘅暖水池，平時唔用就抽乾水變停車場，大開眼界，感受過後更想拍吓電影。」對於發長文致謝名單冇提過樂小姐(樂易玲)，趙希洛就解釋，「轉機時來去匆匆漏咗，我連《開心速遞》編審都冇落名，樂小姐知我係乜人應該唔會嬲。」
40歲的趙希洛坦言唔怕冇咗TVB大靠山：「第一步希望靠社交平台吸客，好似coffee咁真係好勁，除咗教瑜伽又推出自家品牌服裝，好佩服佢，要向佢好好學習。」被指為富貴星二代(母親係前TVB藝員梁小玲，父親經營石油生意又係澳洲大律師)，趙希洛強調家境只係舒服少少，而非有錢就任性：「以前我會坐港鐵轉公司巴士返工，凌晨才『打的』向公司藝員科Claim錢，既然係自己選擇就要負責任，唔使家人負擔。」但她坦承屋企有給她附屬卡：「呢張係安全卡，喺必要時先用。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應