古天后日誌｜港股反彈乏力 或再考驗萬六點心理關口

美國最新數據顯示就業市場持續降溫，帶動債息回落，不過美股周三先升後回，美股高位料作整固，道指早度升逾百點後溫和倒跌，收市跌70點，與標指齊齊連跌三日，標指跌17點；納指亦轉跌83點收市。

數據機構ADP公布，美國11月份私人職位增長，由10月向下修訂後嘅10.6萬個降至10.3萬個，遜預期13萬個，當中製造業職位減少1.5萬個，而消閒及餐飲業職位自2021年2月以來首次下降，跌7000個，該機構首席經濟師Nela Richardson預計，明年整體招聘跟工資增長將進一步放慢。就業市場放緩，市場進一步相信息口見頂之餘，明年或提早減息。

美國10年期債息最多倒跌6.4個基點，至4.107%，不過美匯指數仍偏強，一度轉升至104.23。至於虛擬貨幣比特幣一度曾升穿4.4萬美元水平，目前於4.38萬美元至4.4萬美元水平上落，自9月中以嚟，已累積八成升幅。比特幣高企，反映市場風險胃納仍高漲。

美股早偷步炒減息，結果喺10年債息回落至4.10%情況下，美股反而停滯不前，主要係目前標指市盈率已升至25倍，回報率只有4%，但股票風險高於債券，如企業盈利未能維持高增長，現水平嘅標指顯唔夠值搏率。不過預期明年美企盈利喺低基數下，會有不俗增長空間，呢個正正係美股跌唔落嘅原因。只要明年進入減息周期，美股仍然可向上破頂。

資金捨棄中港股市

至於香港被下調評級，其實不難理解，由於中國為香港主權國，香港評級唔會高過主權國，當中國被下調評級同時，香港亦要跟隨下調，呢啲不過係國際慣例。同一道理，香港評級遭到下調，港資企業也唔會高於香港評級。至於話中國被無理遭下調評級，其實喺過去兩年，內房債爆雷，恒大（3333）面臨破產；投資企業中植系爆煲，地方債亦岌岌可危，內銀隱藏壞帳更加係無法估計，中國信貸評級未被下調，只係轉負面，評級機構其實都好畀面。

目前中港股市所面對係嚴重缺水問題，資金面薄弱，市場自然缺乏效率，股市理應走喺實體經濟前面，醒目資金早早離場，捨棄中港股市，暫時未見有回歸跡象。噚日雖然港股終見反彈，原因係內地財政部及人社部聯合發布徵求意見稿，提出擴大社保基金投資範圍，當中股票類及股權類投資比例上限分別可達40%及30%，若社保基金相應增加權益倉位，將為市場帶嚟3,200億元人民幣增量資金。不過恒指升至周二高位16,600點水平已有壓力，其後傳出內房債相關不利消息，收市升幅削半至135點，收19,463點，成交縮至不足千億，並於外圍隨美股回吐70點，預今日會低開，反彈受制16,500點，將再度下試底部16,228點，再考驗16,000點心理關口。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ