獨家丨63歲蔡楓華冇女都唔會「食粉絲」:會身敗名裂㗎 自揭跟港姐有霧水情曾被肥胖女歌手屈

疫情後蔡楓華(Ken)不斷開騷，繼去年10月及今年6月先後舉行4場個唱，本周5及周6再演兩場。他咬牙切齒表示：「我呢個年紀(63歲)仍然敬業樂業，唔使旨意趕絕我！」激動過後，「紅唇王子」開心自爆當年好有市場，曾跟3位港姐亞軍有過霧水情緣，好命嘅話一早有後代，雖然目前單身，強調唔急搵另一半，但又叫記者介紹，又講明「唔會『食粉絲』！」對於被封「乜王」多年，開到口希望大家可憐吓老人家，更不吐不快大爆曾被肥胖女歌手老屈，嬲到今時今日。採訪：方騫平 攝影：朱偉彥 場地：鮨勘@尖沙咀海運大廈

蔡楓華於本周5及周6移師香港文化中心舉行兩場《蔡楓華「永記情深」演唱會》，他強調在文化中心周五及六晚開騷唔容易，但終極目標，希望有生之年再登紅館開個唱，因為11年前，張耀榮只為他開一場唔夠喉。

蔡楓華多年來堅拒食「免費餐」，絕對唔會玩one night stand。

Ken向來對感情好認真。

Ken叫記者好介紹女仔給他。

阿Ken自爆曾「被派帽」。

蔡楓華強調做藝人要有道德唔會「食粉絲」。

今次揀喺文化中心，仲係周5/6晚開騷，阿Ken話相當難得。

阿Ken對上4場荃灣大會堂演唱會叫好叫座。

11年前阿Ken紅館開Show，但只開一場唔多夠。

真係冇作歌畀陳秀珠

Ken期望似刀郎可以憑《羅剎海市》大翻身，透露今次開Show將演繹自家創作的全新情歌。他又解釋第一首作曲嘅經典歌《倩影》，絕對唔係傳聞中為陳秀珠而寫：「嗰時我經已有女朋友，只不過拍廣告時認識陳秀珠，有晚我哋喺九龍城街頭相遇，咁啱有空檔就去咗尖沙咀飲杯咖啡，期間有向佢提及過首歌，可能佢將兩件事加埋咗。佢仲好笑，當時潑我冷水話『唔慌會好聽！』」

阿Ken否認處男作《倩影》為陳秀珠而寫，講極都冇人信。

1984年陳秀珠演《笑傲江湖》嘅任盈盈，迷倒唔少男士。

問記者有冇女仔介紹

阿Ken澄清多年野史後，再自爆真係有作過情歌畀女藝人，但就不便開名，「佢哋個個住豪宅，有仔有女，有個結(婚)得好好，有個結完又離…」語畢，他又興奮地爆多少少：「我曾經同3位港姐亞軍食過飯，個個靚女嚟搵我，但我冇感覺，自己用情好專一，而且唔鍾意娛圈嘅男女關係，亦自覺好卑微，當時係紅又有乜用？又唔係發哥搵到咁多，冇億億聲，所以同佢哋講：『你哋係屬於有錢人家。』哈！所以我好羨慕李克勤、陳豪咁好嘢，可以娶到港姐冠軍，連靚女都肯下嫁。」阿Ken亦曾「被派帽」，女友一腳踏兩船，他自嘲：「綠帽唔怕戴，最緊要除得快，不怕人負我，只怕我負人，當年我係偶像派，簽婚書會死人，但對方會質疑。當時我同佢(女友)表明『你走還走，留低個仔畀我。』點知佢落咗，仲叫我放低5000蚊畀佢…」

80年代，港姐質素好高，包括82年港姐亞軍鄺美雲。

86年港姐亞軍吳婉芳都好靚女，唱歌又好聽。

蔡楓華以前有「紅唇王子」封號，1981年跟莊靜宜合演劇集《IQ成熟時》好靚仔。

當年靚仔「芹菜」於劇集《IQ成熟時》跟鄧藹霖合作。

昔日「紅唇王子」蔡楓華演三角關係。

阿Ken當年係劇集男一。

蔡楓華羨慕陳豪有靚老婆陳茵媺。

羨慕李克勤娶到港姐冠軍盧淑儀。

阿Ken聲稱63歲冇人要：「𠵱家都係搵個伴嚟陪我啫，你(記者)有冇好介紹？」另外，他擇偶有原則，一定唔會「食粉絲」：「作為公眾人物要有啲德行，試過喺disco門口有女仔衝上我車，我點敢呀？會身敗名裂㗎。而且Fans視偶像係神級，不吃人間煙火，原來都係會挖鼻屎及大便嘅麻甩佬，自然會嫌棄你。」

阿Ken仍有唔少「蔡粉」，但他認為女人多就好麻煩。

Ken年年搞生日會和fans聚會。

唔好再講「乜王」會還手

問阿Ken覺得在樂壇處於咩位置，他稱只係「small potato」：「但我有真正香港人精神，俾人屈、奚落、陷害咗咁多年，我冇EQ仲生存到今時今日？」他不忿說：「你知唔知我承受咗幾多嘢呀？有個身型非常肥胖嘅女人(女歌手)，公然話幫過我好多，又唱我攞嚟衰，佢幫過我乜呀？我成世人冇同佢講過5句說話。」對於「乜王」及「一殺那光輝不是永恆」事件，阿Ken仍耿耿於懷：「我真係忍咗好耐，大家可憐吓呢個老人家啦，我都係人嚟嘅，𠵱家我當自己係抗日戰爭，邊個趕絕我就會還手。」

肥媽一向好鍾意幫人，心地好好。

阿Ken咬牙切齒強調唔係「乜王」，仲話，「如果係，點會開到咁多場個唱？」

阿Ken對「一殺那光輝不是永恆」風波仍然耿耿於懷。

蔡楓華(Ken)跟張國榮冇心病。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ