古天后日誌｜港股再次向上挑戰50日線 惟17400不容再失

11月14日，大致多雲，早晚清涼，下午部份時間有陽光，天氣乾燥。隔夜美股喺最新通脹數據公布之前個別發展，道指反覆靠穩升54點；標指跟納指分別微跌3點及30點。今晚美國會出CPI，呢個數據較為重要，對未來息口去向有較大啟示。從之前嘅數據去睇，估計未來數月CPI會再度回落，主要係油價向下，並未有因為以巴戰爭爆上，二來喺房租房價持續向下。估計今晚CPI回落大約3.3%，當全年CPI邁向3%，美聯儲局其實無乜藉口再加息。核心CPI較受聯儲局睇重，本身扣除油價影響，房租影響力更大，估計同比增長4.2%，環比持平，呢個情況下，淡友仍然有借口去做淡，不過長遠呢個指數都係向住3%嘅水平進發。雖然10年債息仍高企於4.6%，但未有進一步向上，似乎淡友已慢慢撤退，但喺債市就未見完全投降。

中港股呢邊快踏入業績期，睇返已公布業績嘅部份A股，大多數表現唔算差，但股價表現偏弱，主要係場多資金面薄弱，就算交出一份靚業績，亦未見資金入場買貨，結果散戶見業績後唔升就掟貨，結果股價就向下插，呢個係目前中港股市最大困局。並業績好與壞並未能影響股價升跌，反而係缸水問題主導走勢。場內機會不多，中港股市若要回升，首先係解決資金問題，業績仲係其次。

雙11旺丁唔旺財 業績公布見真章

個別板塊營收增長大，但盈利反而倒退，呢個情況喺電商平台最為明顯，拼多多、京東（9618）、阿里（9988）嘅淘寶，競爭大要靠補貼作戰，例如京東、拼多多就用咗成百億去補貼大戰。經過雙十一購物節。各大電商如去年未有公布銷售額，銷售成績係旺丁唔旺財，大家心中有數，到業績公布自然見真章。反觀美股，即使估值偏高，業績出來增長亦唔算強勁，但美企股價就算有回吐。兩三下就拉升行返上去，呢個明顯係場內資金多少嘅分別。

中國債務問題嚴重，內房債已率先爆雷，阿爺唔希望內地銀行出現太量壞帳，關乎國家體面問題，唔少銀行將呆帳打包，再轉售予國企，試圖壓低壞帳撥備，數目喺數百億元之間，但相對估計逾萬億壞帳，呢個方法都只係治標唔治本，杯水車薪，不過可以睇得出阿爺心態上，係想用個拖字，以時間去消化個問題。

港股噚日成交額只有750億，但全日波幅330點或1.9%，資金面雖薄弱，但波幅超過300點，市場仍然有人炒落。恒指尋日先跌後升，終止上周連續4個交易日跌勢，低位17,126點剛好守住上月低位延伸至今嘅上升軌底部，尾市發力倒升逾200點收17,426點，重越20日線。夜期升勢延續，預期今早恒指高開升穿17,500關，但要企得穩方有力再向上挑戰50日線17,700點關，即市回吐支持為10日線及50日線附近，約17,400點至17,450點，後市要上，此關不容再失。

相關文章：

港股市況｜美今公佈通脹數據 恒指高開68點 理想首款電動車快亮相 股價升4%

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ