古天后日誌｜港股勢仍弱 未能重返多條平均線上

11月13日，部份時間有陽光，天氣乾燥，早晚較涼。市場消化聯儲局主席鮑威爾鷹派言論，另有聯儲局委員指毋須再加息，美股上周五借勢反彈，道指升391點；標指跟納指分別升67點及276點。雖然美債息一度回落，但及後亦重返4.6%水平，不過VIX回落至14.17水平，反映較早前回調已告一段落，目前標指於4300至4450之間徘徊。科技股反彈力度較大，Nvidia踏入11月展開反彈，錄得八連升，累積反彈逾兩成，一眾科技龍頭股仍然主導美股氣氛。

自7月起，市場熱炒美國第3季GDP強勁增長，PPI及PMI連續3個月回升，不過10月PMI及PPI出現放緩，新增訂單亦未見預期中強勁，油價一直向下走，即使10月以巴爆發衝突，甚至演變為戰爭，油價有過小幅反彈，但仍未有扭轉向下趨勢，上周已跌至75美元水平。喺油價未有大升下，通脹料可以受到控制。

中國及美國PMI又降回50之下，反映製造業需求只是回穩，暫未見喺低基數下作出強勁反彈，預估明年美國GDP增長率只有1.4%情況下，未來經濟更可能是L型發展，估計油價或繼續於70美元至80美元區內橫行。

雖然美股上周五大幅反彈，但中概股只係靠穩偏好，雙十一購物節前3大電商平台拼多多、京東（9618）及阿里（9988）只係靠穩，未見再如過往熱炒雙十一，今年平台亦繼續保持不公佈銷售金額。

據第三方數據顯示，料全網成交額只有2,434億，較去年5,060億減少一半。其中阿里的天猫及淘寶佔60%，京東佔27%，拼多多佔7.5%，今年京東以減價補貼方式，直接挑戰淘寶直播一哥，結果打至兩敗俱傷，減價亦谷唔起銷售額，其他直播帶貨平台如抖音同樣仆直，可見內地降級消費後，內地電商平台生意難撈。有小道消息指月初至今嘅高銷售量，退貨率高達四成，呢個亦係今年電商股未能借雙十一炒上原因，股價反而只跌不升，京東更屢創上市新低。

過往雙十一靠打折喺短時間內吸引買家造勢，刺激潛在買家跟風消費，但經過呢兩年阿爺呼籲「理性消費」後，電商退貨率就一直高企，大大增加電商成本，結果造就呢兩年崛起嘅直播帶貨行業，誰知今年多次爆出所謂直播帶貨，不過係抬價哄人高價買嘢，帶貨遊戲又無得玩。事實上，京東多次破底，而阿里亦只能喺80元水平上落。

內地相隔兩個月後再度陷入通縮危機，打擊港股氣氛。恒指上周下挫461點，終止兩周連升，多項技術指標反映市況依然疲弱。黑期今早反彈，預期恒指今早隨外圍高開，20日線現下移至約17390點，又成為即市反彈阻力，即市支持為上周五低位17177點，下破跌勢未止。

本周習拜會係扭轉弱市契機，不過周三及周四有騰訊（700）、京東及阿里公布第三季業績，三大巨頭業績有乜冬瓜豆腐，即使中美關係因為習拜會後有所改善，巨頭業績市場唔收貨，港股都係易跌難升。

---
投選心目中把ESG實踐得最好的機構 贏主題樂園門券！ https://bit.ly/46TyJFM

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ