劉鑾雄記者會全程直擊！大劉透露將改遺囑「執行老婆意思」坦言開記招目的：至少還一個公道畀太太

2023-11-10 15:25

富商「大劉」劉鑾雄今日（10日）較早前突然宣布於下午3時30分在銅鑼灣舉行記者會，就近日內地網上的文章作出回應，部分文章聲稱大劉出現「遺囑風波」，財產分配出現變化，以及涉及當年華人置業投資中國恒大債券後出現虧損後的影響。大劉在記者會中近日多個傳聞作出回應，主要內容有關投資恒大虧損、甘比投資失利、遺囑風波及財產分配等。今次記者會歷時一個多小時，大劉依然聲如洪鐘，狂轟「賤人」各種行為，疑似向前女友呂麗君火力全開。

【相關閱讀】：大劉突然宣布今午開記者會！傳為澄清遺產分配傳聞

16：50 記者會正式結束

16：40 被記者問：「看好那個兒子日後掌管公司？」大劉表示，能者居之，也不便講。而問他有否看《愛·回家》而叫子女多回家？大劉表示「有看」，但沒有叫子女多回家。「是否開完記招後感覺舒暢？」記者再問，大劉表示：「不是，至少還一個公道給太太。我唔係舒服晒，我係還返個公道（畀太太），真係好緊要，呢個先係我最重要，唔係人哋真係以為佢蝕咗200億，或者依家失勢，乜乜物物，完全冇咁嘅事，咁但係你點會咁大段文章講咁多廢話丫。佢做錯嘢做得唔啱我都會炳佢，佢做得啱我梗係要支持佢啦。好嘛？咁多位記者朋友。」

記者此時提問：「會否入市香港股票？」大劉表示，個人認為市況一定不會死，有能力可以在這時候可以入市。而大劉又指，現在的願望是身體健康。

其後現場有記者問到有關許家印事件：「有冇嬲過許生？因佢營運失敗牽連被大造新聞？」

大劉則說：「我從來冇嬲佢，我係嬲我自己，因為我老婆同佢家姐講過不下200次，叫我賣啦賣啦，我話我賣先佢一定X街，快得過佢應該要X街，我要賣都要報㗎嘛，無論股票定債券，係我自己唔聽老婆同佢家姐話啫。」

記者再問：「嚟緊會否減持恆大？」他則說：「第一，唔答呢啲問題，第二，你而家問啲咁嘅問題，我都要Wait and see㗎大佬！你而家國家話要救佢，全部包起佢分帳，咁又唔同喎，但呢啲而家我哋唔知㗎嘛，我唔想講，因為日日變㗎嘛，你又唔係財經記者，係咪先？好似今日同朋友商量研究下，好笑呀朋友答得好好，有個新聞話李強要親自平均保險去救碧桂園，大陸朋友作個比喻，三萬噸嘅船就嚟沉，你一萬噸嘅船想拖佢走，一萬噸嘅船有乜資格去救你三萬噸嘅船呀？！你明唔明我意思先？當然係咪我哋唔知啦，但係定唔係遲早會見真章。」

記者再問：「有冇邀請你去「恒大歌舞團」？」大劉說：「第一，真係完全冇，我發誓！第二，好多大陸朋友最興用女色嚟Please男人，你認為大陸朋友用女色嚟Please我Work唔Work呀？唔Work囉我同你講，講完啦，嗰啲咁嘅嘢第一，雖然我今日又老又企都企唔穩，我都唔係要識嗰啲咁嘅……有冇睇嗰啲相呀？個個籮柚都着咗打底褲，都好大個籮柚，我見到啲相咋，我未見過啲歌舞團。每個人做生意方式都唔同，起碼你冇乜聽過我搵班靚女出去應酬呢啲商界朋友，個個Style都唔同。」

其後記者再問：「同朋友傾偈有冇發現新投資機會？」

大劉說：「喺今日真係有投資新機會，真係要小心小心又再小心，因為今日做生意環境好惡劣，好似今日睇新聞東涌嗰塊地一張標都冇人落，係十年內第一次，有個地產界資深人；第一貴，第二供應多，都唔知買咗能夠用咩價錢賣、賣唔賣得出，做生意都係計數咋嘛，好似我呢隻錶、呢個電話用100蚊做，我可能好有把握賣200、300蚊咁咪做囉，我100蚊成本買個手機，我都唔知賣到80定70蚊，咁我點會去做呀，做生意就係咁現實，當你有錢賺，無論賣魚蛋、車仔麵都有人做啦，因為易搵嘛，唔好講到咁遠，我想講呢叠嘢（指網上假新聞），唔該你睇吓。」

有記者提到近日賣地市場。

大劉直說：「第一，講句坦白啲，我有錢入都唔敢入，何況有錢都用嚟守門口啦，你睇吓美國今日個市點跌我唔知啦，個聯邦儲備局長又話如果發現通漲壓唔到，佢毫不猶豫會加息，所以昨晚美股先跌，香港都跌啦，啲地產股都跌到好犀利。（你話有錢都用嚟守門口，手上啲藝術品會否揀時機出貨？）呢啲講Timing（時機），唔好價你出都冇用，唔通你賤價賣呀？如果好價就唔理經濟好唔好，我都照賣啦，即係而家個熱潮過咗，人哋幅畫可以賣到2億幾嘅，佢賣得1.7億，咪Timing問題囉，所以呢個唔關經濟好唔好，係Timing問題。」

記者問到現在香港經濟差，有無建議，大劉說：「我唔識答你，亦唔敢答，因為牽涉到政府嘅嘢，做官梗係叻過我哋啦，點解呀？個官字點寫呀？有幾多把口呀？（點睇香港樓市？有咩建議畀市民點做？）我點有資格講呀，論輩分論size個個都叻過我哋，咁我哋點有資格講，係咪先。（樓價會繼續跌？）唉，我個人覺得呀，唔應該講我都講，如果政府再唔做番啲好嘢，即係啲措施，我大膽講，冧咗都唔係咁易救得起。」

不過大劉續說：「但政府又好慘，佢撤辣又驚，唔撤又驚。舉例有人希望香港市民住得大啲舒服啲，你有錢可以住25萬呎嘅屋，冇錢100呎劏房四、五個人都要住，咁究竟中央係想樓價跌，等劏房嘅人可以住闊啲舒服啲？呢個好矛盾架喎，所以我哋真係唔知，我哋唔係做政治做官，點知上面同香港點諗，幾時輪到我講嘢，我而家talking too much喇。」

16：30 大劉被問到除了開記者會外，還會如何反擊呂麗君？大劉說：「太太叫他不要出來開記者會，不用理會報道，不要為賤人勞氣。」大劉也坦言，開記者會會影響身體，說話傷身。「會否採取法律行動？」記者問。他則說不會，又爆對方有次在半夜11、12時搵人拿民事傳票給他，他又說「咁賤咁衰嘅人第一次見」。

記者再問他：「咁張傳票內容係？」他即說：「咁我梗係唔方便講。（問你攞錢？）唔係，總之唔方便講。」大劉還笑言對方扮好nice、乜都唔知，更模仿女性聲說：「真係無㗎，我無呃你㗎。」

大劉續言：「你哋咁多咁後生，我由幾歲𡃁仔瞓地下到今日，我見壞人都見唔少，但咁X賤咁X壞嘅人，都係第一次見。」此時有記者問：「壞過凱婷？」大劉顯得有點一頭無緒：「吓？壞過咩？咩凱婷？」記者解釋是潮語，意指好壞嘅女仔，大劉說：「我唔知，真係唔識呢啲嘢，我呢啲又老又out，而家識喇，但我都唔知咩意思。」記者續說：「食煙就係壞，佢（凱婷）食夠兩支。」大劉：「咁你認為食煙壞唔壞，你話食白粉、食可卡因，定係食煙壞吖？」

有記者問：賤人變壞之前有無勸過佢？

大劉：「梗係有，但係有用咩？唉……我剩係講佢全家都係納米型、納米型嘅賊仔，全家。（你最後一次見佢係幾時？）我都唔記得啦，點會記呢啲嘢。」大劉又表示失實文章是今日同事給他看：「我唔識睇手機、唔識睇電腦；係今日公司啲同事print畀我睇，我睇到好嬲，都唔知咁大單。」

劉鑾雄記者會現場照片：

大劉記者會吸引多間媒體採訪。

全部記者均戴上口罩。

有工作人員派口罩。

大劉座位旁邊有毛巾、口罩。

16：20 大劉大讚甘比聽佢話，又指自己有幸今日開這個記者澄清：「我今日仲有得say，陳凱韻肯聽我說話，我3個仔女都肯聽我說話，答完你未吖？你清唔清楚我意思？我而家突然話呢個哥哥姐姐，話佢幾醒目，『老婆送1000萬、100萬畀佢』，佢（甘比）一定會照做，你聽唔聽得明我意思？因為佢哋好清楚知道啲錢係我好辛苦賺返嚟畀佢哋，唔係佢哋賺㗎嘛，佢係一個正常人，係咪應該質疑我意思先？你頭先答我問題，我答咗你㗎喇。

及後在場記者提問：「但你一定唔會分畀某啲人？某啲賤人？」

大劉回答說：「賤人梗係唔會啦！你呢個問題都有少少問題啦！我長命一萬歲都冇機會啦！佢實破產㗎！貪到死，乜嘢都要借，你睇佢買嗰個晉環，畀10% deposit，畀15%政府！你夠薑嘅，你畀晒現金啦！我見啲有錢佬老婆畀現金，收租唔駛驚個payment吖嘛，但畀10%deposit，畀15%政府，你話係咪傻㗎？問題都唔係問題嚟嘅，你話係咪傻傻哋吖。」

現場記者再問：「嗰個人邊個投資蝕得最多？」

他又說：「我同你講吖，乜嘢投資都有，佢傻㗎嘛，邊度識投資。佢以前同我講倫敦買咗啲物業返嚟，全部都係作出嚟！我而家夠話美國白宮都係我負責起㗎，任我吹，你信唔信吖？我而家想呃你啊，靚女，你想住倫敦白金漢宮，定華盛頓嘅白宮？你信唔信吖？我諗全世界1萬個有錢佬都買唔到呢兩棟物業。佢講大話唔使眨眼，出口成詩㗎！」

現場記者再問：「佢啲仔女知唔知佢啲衰嘢？」

大劉說：「I really don't know！我真係唔知，佢好識洗腦㗎。以前有個伙計退休，我諗住畀筆退休金，又呃咗我幾百萬，後尾我知道條友根本無收過錢，呢啲咁嘅錢都偷嘅！好多呢啲咁嘅錢，一支牙膏、一張單都claim3次，呢句說話我作出嚟嘅話，我絕子絕孫，七個仔女養唔大啊！」

記者再問：「最近一個月有無改遺囑?」

他再爆料：「我早排一早分咗，我而家要再改，都要老婆執行我嘅意思，你聽唔聽得明啊？我而家自己乜嘢都冇！但係我相信我呢個老婆陳凱韻，叫我做乜我都會做。佢唔止牙膏claim三次，喺起級市場地下啲單，佢都執嚟claim，你估我唔知咩？（記者再問：你點知佢執單？）我哋會計部check單check得好緊㗎！即係你話買眼鏡，係咪你戴緊？佢最擅長係點呢？買咗個名牌袋之後，平價賣返出街。我記得40幾年前去夜總會，啲舞女最鍾意搵老襯。5千蚊買日本時裝，我就收返4千蚊現金，時裝舖就剩袋1千，40年前好興呢啲嘢㗎。」

現場又有記者問：「到呂麗君的兩個子女已經長大，會否獨自生活？」

大劉：「你問得真係好，我真係想擁抱你，唔係想非禮你啊。依家個仔得13歲，如果佢18歲，有自己獨立可以選擇，佢想跟我住，就同我一齊住。（記者問有無聽過兩個子女口風？）記者姐姐，人會變㗎嘛，我今日最愛嘅你，聽日我就唔知喇，大家都識講呢啲說話。」

16：10 大劉繼續炮轟呂麗君：「數目字係邊時？以前買塊地萬幾蚊，食碗叉燒飯7毫子，依家邊有？唔同時間數字就唔同。佢係納米型小賊，成家都係。買埋啲Accumulator，I'll kill you later！佢買晉環，人哋一次過畀錢買，佢10%做deposit，15%做stamp。佢無腦㗎，做鴕鳥，以後再唔會救佢，再無關係。我打畀仔女時，佢就搭嗲，你估我會唔會聽佢電話？我出院時，佢見我未死得就扮Close，我即刻同陳凱韻結婚，點知要分身家先有保障。我開記者會之後一星期，我同律師講寧願分錯都唔願畀佢得益。可能我斗零都唔分，可能留畀我老婆同佢三個仔女決定，怕俾佢撻埋。有冇睇早排《東張西望》？有個肥女人嫁咗四次，間公屋都呃埋個仔。陳凱韻肯聽我說話，三個仔女都肯聽我講話。」

記者會現場有一叠有關大劉的失實文章報道。

16：00 大劉再為分身家傳聞解說：「又話全部財產轉畀個仔，甘比踢出局，點解要咁講呀，自己開心囉，講就有人信，有一個重申，阿陳凱韻我老婆從來無同我蝕過錢，睇過金融投資，佢藝術賺到錢。點解叫我唔好理，今次開記者招待會影到某個仔同女，我都無辦法，即係如果要入屋殺我屋企人，我跛咗癱口咗，我都垂死掙扎，垂死嘅反抗啦！」

他續說：「不過今日見到咁多叠嘢，好在嚟開呢個記者招待會，我頭頭睇嘅第一頁啫，睇到咁大叠嘢，火都嚟Q埋，係咪呀！危機關頭、藝術品套現，如果你有記性嘅，阿Su呀，甘比賣（嘢）係幾多年前呀？（十幾年前呀），唔係賣出去呀，應該都3年前呀，（係呀差唔多！）我哋買返嚟700至800萬，賣2億幾，你賣唔賣啊？嗰時咁差㗎，有某人幅畫仲靚過佢，如果嗰時我哋賣2億幾、3億，佢都好唔抵得，點解佢嗰幅靚過我哋嗰幅，賣1億7，因為timing問題啫，藝術品呀，樓價你五年前買樓呀，咩價錢你都知啦，大家知咩環境，都要老作老屈，都係啲人作出嚟。」

大劉又指網上傳聞離譜，直言恐怖再不回應便有人會傳他「死咗」：「我再唔出聲，有個朋友真係以為我有事就嚟死，打電話，大哥你冇事丫嘛，我有咩事呀？網上傳你就嚟死喎，其實我依家同你講嘢把聲，似唔似就嚟死。我長話短說，呢疊嘢佢哋個個都有，你見到啲咁嘅嘢，咁有咩人會做呢樣嘢出嚟呢，事實冇咁嘅事嘅，邊個得益呀，自我陶醉囉，我夠想做呢個宇宙最有錢嗰個，如果成個宇宙滅亡咗得我一個，得我唔死嘅，我咪最有錢囉，其他三個都死晒咯，我幻想咁，咁邊個會作呢啲新聞出嚟呢，一個人自我陶醉，到底有冇人信，我真係希望我一年前，唔幫佢單破產。」

現場有記者問：「係咪後悔幫咗佢？」他即說：「係，我承認呀！做人呀唔好講你哋丫，我由細個𡃁仔到今日呀，可能我長命多10年、15年，我都會做錯嘢，都會後悔丫，啱唔啱先。」

15：55 大劉又指：「（啲傳聞）係好嚴重失實，聽聞佢請咗網上打手，請咗以前《忽然一周》總編輯帶呢隊人，專係負責做呢啲嘢。講到佢幫我損失百幾億，又話個仔乜乜，仲話我就嚟死。我早幾日約朋友食飯，話出面傳我身體好差就嚟死，你睇我而家個似唔似就嚟死？可能畀人激死就有，但我自己身體係冇嘢。如果我再唔出嚟，可能傳我死咗。」

大劉隨後再疑似用「賤人」一字諷刺呂麗君：「呢個賤人最近去新加玻，冇人識佢㗎，自己招搖撞騙，人哋見到佢都驚咗佢。我夠可以喺電視同拜登合照、P圖話佢企喺我隔嚟啦！以前台灣有套電影叫《養鴨人家》，你知唔知鴨同鵝分別，鴨只係做女人生意，鵝就男又做女又做。呢啲係佢嘅私生活佢嘅事，唔關我事，我點解咁講呢？你睇吓呢叠嘢，完全0.001事實都冇，夾硬作出嚟老屈，我再唔出幫即係默認。我老婆陳凱韻使乜理佢吖，佢自我陶醉之嘛，等於咁，有一日有人要殺我屋企人，唔好講我係咪跛，我係跛係殘廢啊，我都要保護屋企人！啲人造謠造到咁，傳到我就嚟死。」

他又指：「啲人話我娶咗陳凱韻，佢阿媽換咗個腎畀我，所以我要報恩娶佢做老婆，哈哈哈！呢啲真係好好笑，哈哈！我換腎都搵個後生啲吖，搵個老人家換，希望一年換一次咩。呢啲謠言全部都係呢個人作出嚟，有網絡打手。佢好精㗎，喺香港出好易俾人睇到佢出，所以喺大陸出，我check晒出嚟。我見完呢疊嘢。」

15：50 大劉續指甘比沒有為他帶來幾百億損失：「簡單講，陳凱韻從來冇幫我損失過任何錢，冇損失百幾億，佢同我賺超過200億藝術品上收入。如果有損失，都係我自己決定，完全唔關佢事。但啲人點解咁講呢？「800億落空」，呢啲好似真嘅一樣都係假嘅；仲話我將啲財產畀個仔，完全都係冇嘅。」

15：40 大劉澄清太太甘比從來沒有為公司損失200億元，「佢同我賺超過200億藝術品投資就有」。大劉又指，所有投資損失都是他自己，所有有關他投資損失的報道，都是虛構及嚴重造謠。

大劉在記者會上表示：「後悔成年前幫個賤人（呂麗君，現名呂姵霖），當時唔想佢破產睇返轉頭，幫佢破產好過，點知佢有自己網上打手，做而家嘅嘢。」大劉解釋，呂麗君聘請前雜誌總編輯，做網絡打手。他指，甘比曾經勸阻他不要澄清，怕影響子女，但他稱「如果有人入屋殺我屋企人，我跛咗、癱咗，都要做嘢。」

15：30 劉鑾雄記者會約在下午3時半開始，大批記者在門外排隊進入會場，所有記者均需戴上口罩，現場更有工作人員向記者派發口罩佩戴，又有不少防疫用品，大劉座位旁邊更有不少白毛巾。