頭條戲場丨《韓戲逼人》黃金畫面 GET

2023-11-10 08:00

唔係只得《無制限探險隊》先會追求黃金畫面，《韓戲逼人》內飾演金導演的宋康昊都會。預告睇到成頭問號，又黑白又彩色，畫面碎濕濕，想點先?其實故事一啲唔複雜，一位好有才華(自稱)的金導演，拍完新作後覺得結局唔多掂，為令作品變曠世鉅作決定重拍結局。電影包含兩個故事，金導演如何成功爭取重拍的故事及超狗血的戲中戲，戲裡戲外來回切換，意外及荒誕事情無限Loop，人人都手忙腳亂，笑位估唔到咁多，驚喜發現鄭秀晶(Krystal)原來識做戲。(上映中)撰文:廖思慧

電影上映中。

電影故事背景設定於1970年的韓國，當年南韓電影被嚴格監管，創作有好多限制，劇本一定要經政府審批通過先可以開拍，已經完成嘅電影要重拍結局，近乎冇可能，電影公司老闆一定Say No，但金導演好勇，左呃右𠱁演員歸位片場，越拍問題越多，片場中人人都有唔同意見，你一句我一句，令電影有相當高的娛樂性。

金導演得兩日補拍時間，一埋位就開行Turbo。

千辛萬苦終於可以安樂補拍，金導演好肉緊。

補拍時勁多意外發生，金導演頭都大埋。

Krystal好嘢
戲中屬黑色喜劇的現實世界以彩色畫面呈現，懸疑加倫理加出軌的戲中戲就以黑白片手法處理，特別一提戲中戲有極強古早味，講對白的節奏及拍攝角度都好搞鬼，識笑相當好笑。電影大星雲集，有林秀晶同全余贇，最出位是飾演當紅花心大明星的吳正世，有老婆但經常同女明星有染，咁啱戲中緋聞女友就係戲中戲的情婦宥琳(鄭秀晶飾演)，戲內戲外的身份完全重疊，做渣男冇好下場，演嘅痛苦，執導嘅更痛苦。特別一提被呃去片場又被發現搭上有婦之夫，長期Keep住崩潰狀態的鄭秀晶演得相當唔錯。