古天后日誌｜債息急抽 好友動彈不得只有捱打

11月10日，大致多雲，短暫時間有陽光，間中有一兩陣驟雨。雖然美國就業市場持續放緩，為聯儲局結束加息提供理據，偏偏鮑表示稱必要時將堅定地推行緊縮措施抗通脹，因為未能確定有否有效控制通脹，偏鷹言論令10年債息急升，重上4.6%水平之上，結速美股超過一個星期嘅反彈升勢。美股高開低走，並跌至全日低位收市，道指跌220點；標指結速七連升，跌35點；納指則跌128點。VIX回升至15.29，呢個數字又唔算太恐慌，暫時未對美股構成威脅。目前美股主要由市場情緒主導，而市場情緒則取決於債息走勢。

從經濟面分析，CPI中線將回落至3%，就業疲弱等原因，令美聯儲缺乏再加息借口，但國會未能通過財政預算，政府可能最快下星期又停擺，加上大量公司債年底需再融資，令淡友死口咬住唔放，雖已收歛沽空，但仍未肯完全撤退。

鮑爺放鷹 淡友利用悲觀情緒恐嚇市場

鮑爺強調要進一步打壓通脹，唔單止係進行供給側改革，更需要收緊貨幣政策去配合，言下之意係短期內貨幣仍會趨緊，並暗示最快要明年下半年先會考慮減息。其實都預咗無咁快減息，但淡友認為仲有機會再加息，結果將個10年債息扯高。淡友利用悲觀情緒去恐嚇市場，11月唔加息，咁咪預佢12月加，12月唔加又話明年Q1都會加，利用市場情緒推低市場平淡倉，不過後市如何，仍要睇好淡雙方嘅實力，但美股逢低吸納睇法未變。

其實美債息難以長期高企，美聯儲官員亦明白當10年息升穿5%時，垃圾債可能出現爆煲潮，官員出口術說會加息，無非係為咗打壓通脹，而唔係想經濟爆破，所以當10年債息升穿5%，官員就會轉軚放鴿，一旦回落至4.5%樓下，危險漸過，佢哋又會放鷹，如事者市場大戶就係利用呢啲言論，去舞弄市場。

至於港股隔晚隨美股下跌，預期恒指低開跌穿10及20日線後，將進步下試回調升幅61黃金比率0.618支持位17,322點及17,300點關，失守下試17,200點尋找支持，順手殺埋牛證重貨區。若然重貨區牛證KO後，今日都唔反彈重返17,400點水平，後市都係瓜多過菜。

相關文章：

鮑威爾放鷹 稱必要時將毫不猶豫再加息 美股三大指數下跌

---
投選心目中把ESG實踐得最好的機構 贏主題樂園門券！ https://bit.ly/46TyJFM

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ