古天后日誌｜好友有心無力 場內資金面弱為主要問題

11月9日，大致多雲，初時有一兩陣微雨，日間短暫時間有陽光。隔晚美聯儲局主席鮑爺發表講話，避談貨幣政策及經濟前景，不過10年美債息回落至4.5%，但美元仍然維持強勢，美匯指數於105至106之間徘徊。雖然市場普遍認為息口已見頂，但仍等待更多聯儲局官員發言，以推測未來息口路徑。

美股隔晚個別發展，道指跌40點，但標指連升八個交易日，係兩年以嚟最長連升日數，隔晚再升4點；納指則升10點，變化不大。但反映中概股表現嘅金龍指數則跌0.46%。美股喺空軍大舉平淡倉後，再大幅上升動力有限，預期標指將於4300至4400水平之間整固。

美股走勢仍然取決於息口去向，一旦10年債息回落至4%以下，美股吸引力自然大增，不過目前10年債息仍然係4.5%水平，美股吸引力相對下降，資金亦唔願意高追。另一個主導美股走勢係企業盈利增長率，標普500強至今已有超過八成公司公佈咗業績，當中約六成公司收入超標，但唔少公司管理層指出市場需求十分疲弱，對第4季業績及明年業績預測較為保守，甚至有所保留，呢個正正係Q3業績公布後，大部份公司股價都向下走嘅原因。

加息效應令民眾減少多餘開支及減低消費意欲，預期大部份美企第4季收入只能保持低單位數增長，不過盈利喺去年裁員效應下，成本已有所下調，仍有望因為成本下降而保持較高增長。市場憧憬息口見頂，並估計明年減息後，市場需求將有所回升，因此美股股價仍然偏高，市場買入美股並唔係睇單一個Q4業績，而是買明年經濟並唔會出現衰退，甚至有所復甦，美企業績就有機會回升。

喺美債息回落下，美元強勢有所扭轉，加上美股估值偏高，理論上資金回流亞太區，可惜未見中港股市受惠。人民幣離岸價回升至7.28，有助A股繼續反彈，早前內地再發行1萬億元地方債，令A股場內資金漸見回暖，深滬兩市成交已連續三個交易日高於一萬億元。至於港股呢邊，成交仍然低迷，主要係未見有資金流入，外資固然撤走後己不回頭，內地資金亦集中投放於A股市場，對港股興趣不大。目前港股場內資金只係喺不同板塊之間輪動，短線炒作，繼續塘水滾塘魚。

隔晚中概股偏軟，不過ADR則靠穩，今早料港股變化不大，指數波幅近日收窄，衝高至萬八關掉頭回落整固，失守50日線後，似乎有意進一步考驗20日線17500水平。今日即市支持為20日線及10日線匯聚區17400至17500，失守的話短線反彈可能又告一段落。至於好友要喺本年度僅餘下嘅兩個月內反擊，盡快修復50日線17700至800水平企穩，才有望再重上萬八關並向上挑戰100日線18400至500水平，可惜喺缺乏資金入場配合下，好友有心無力，港股仍然偏弱。

---
投選心目中把ESG實踐得最好的機構 贏主題樂園門券！ https://bit.ly/46TyJFM

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ