古天后日誌｜港股如要保持反彈 20日線不容有失

11月8日，大致多雲，有一兩陣微雨，天氣略為轉涼。雖然芝加哥聯儲銀行總裁接受訪問時，仍強調聯儲局首要焦點係將通脹降回2%目標，言論偏鷹，但未有表示聯儲局有否需要進一步加息，但英倫銀行首席經濟師則暗示明年中可能考慮減息；歐美股市表現反覆。美股三大指數最終仍保持上升，道指升56點；標指跟納指則分別升12點及121點。VIX指數維持喺15以下，反映市場並未見恐慌，不過喺大量空軍陸續撤退平淡倉下，美股短期上升空間有限，標指短線或於4,300點至4,400點之間上落。

買美股是憧憬明年減息

目前標指平均市盈率為19倍，以明年盈利增長10%計算，市盈率將降至17.2倍，回報率為5.8%，10年債息需回落至4%水平之下，標指先會重現吸引力。10年息若保持5%，標指吸引力麻麻，因此目前買美股係憧憬明年減息，目前較影響美股仍然係債息變化，以及盈利增長率。

至於影響息率走勢都係取決於通脹相關數據，未來半年CPI將會由4%慢慢回落至3%，主要係工資及房租回落等因素。但要跌破3%進一步回落至聯儲局目標嘅2%仍需較長時間，不過市場已開始轉風向炒減息，目前市場估計明年將減息兩次，持續高息下，美國政府每年利息支出已突破1萬億美元，佔總支出17%。

若通脹開始回落，相信白宮會向美聯儲局施壓減息，雖然美聯儲局係獨立運作，理論上係唔需要理會白宮指令，但美聯儲委員都係銀行家，高息令企業財困面臨爆煲，從商業角度上都要考慮平衡，目前美聯儲出口術放鷹，無非係為咗打壓需求，為日後減息時通脹再度死灰復燃買個保險。

市場氣氛已有改善

至於港股方面，以估值計算係不合理地低，主要係場內資金面太弱，就算之前由8月至10月港股持續向下，但期間成交唔大，只係陰乾，沽壓其實唔嚴重，只係無資金接貨，淡友放肆沽空。不過唔少板塊已早過指數見底回升，莖至有部份個股如小米（1810）更已升至52周高位，反映市場氣氛已有改善。

噚日大市未能企穩50日線17,782，回吐近300點，雖然現貨成交縮減至低於900億元，沽壓有限，但隔晚夜期一度低見17600，今日提防再向下測試呢個位。即市支持為17,600點，暫時17,800點至17,900點阻力較大，20日線17,500點水平不容有失。今明兩日需企穩50日線及重返18,000點企穩，後市方有力再向上挑戰100日線，即18,400至18,500點水平。

---
投選心目中把ESG實踐得最好的機構 贏主題樂園門券！ https://bit.ly/46TyJFM

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ