星8卦｜「秀氣」「才子」痴戀不得善終被分手變第三者殺手嚇怕人妻

2023-10-27 11:00

有啲女人嘅命特別桃花旺盛，而大部分嘅男人都係俾佢哋嘅外表呃晒！「秀氣」簡直係表表者，出道前男友一大堆，但出道後就扮純情，拍咗套青春電影，既同男主角撻着，亦同初次執導嘅「才子」愛得要生要死，於是成部戲拍得佢又靚又有氣質。佢係大贏家，連演技派男主角都助佢一把，但最後「秀氣」揀咗同「才子」一齊，因為對方喺佢身上搵到初戀感覺，竟然返去同自己當年喺大學追到嘅校花老婆講分手。

「才子」唔係無本心嘅人，但「秀氣」就成日表態話唔做第三者，叫佢二揀一，結果「才子」返屋企要老婆離婚仲即刻賣樓，話要筆錢同「秀氣」生活。老婆好傷心，於是有一晚諗唔通玩自殺，「才子」終於停低諗一諗，決定唔再拋棄髮妻，但輪到「秀氣」要生要死，話要同「才子」一拍兩散。結果「才子」返咗老婆身邊，亦搵咗自己嘅老闆同「秀氣」解釋，佢仲有大把前途，唔值得為「才子」名聲盡毀。

雖然「秀氣」放咗「才子」一馬，但從此佢就成為第三者殺手，專揀有老婆嘅埋手，咁多年都搞散唔少家庭，所有老婆一見到佢都唔准老公接近，但呢種鴕鳥政策只會令「秀氣」覺得好玩，更有成功感！　　　　