專訪｜「御用師奶」黃梓瑋讀淘寶大學學直播再轉戰抖音搵真銀 強攻大灣區公開博主掘金秘訣
直播帶貨近年相當盛行，一眾人氣高的TVB一線花旦、小生都紛紛加入直播主行列。但人氣又是否跟直播銷售額成正比呢？入行逾20年的無綫資深演員、有「御用師奶」之稱黃梓瑋，近年亦加入直播帶貨行列。
她接受《星島頭條》訪問時表示自己由入讀淘寶大學學直播，其後轉戰抖音，現時更擁有固定粉絲，日日追睇其直播。黃梓瑋坦言人生因此出現轉變：「冇諗過㗎，只係因為一個疫情，而令好多人生活方式都有轉變，任何一樣嘢都想試，呢個算係自己宣傳自己方式，都可以算係一個新出路。」
點擊睇黃梓瑋入行逾20年經歷：
訪問當日在黃梓瑋主理的《港真靚貨》直播間內進行，雖然直播室面積不算太大，不過五臟俱全，內裏有各種各樣的銷售貨品，寫字枱上擺了多部大電視，電視附近裝有直播所需的各種工具，直播用的打燈泡，一部又一部的手提電話，黃梓瑋兩、三下動作，很快開機與網民進行直播，話題包括日常生活的軼事，笑聲此起彼落，感覺溫馨。
黃梓瑋坦言當日在無心插柳的情況下，加入了直播帶貨行列，她說：「大約係2020、21年左右，嗰陣因為疫情，又唔可以出街，如果唔使返TVB，咁都要搵啲嘢做，咁啱嗰陣有個叫淘寶大學嘅主播課程，我唔知原來做主播都要讀書，所以咪去試吓。」
黃梓瑋還說：「其實喺內地直播帶貨呢樣嘢已經有咗好耐，淘寶佢哋真係搵埋導師，有埋證書，最初係喺線上返學，最後嗰一堂就連埋考試一齊做。畢業之後仲有一張證書，之後咪開始喺淘寶實習，學點樣做直播帶貨。」其後因為抖音的掘起；在協會的安排下，黃梓瑋在抖音試播，成功通過測驗後，她便成為「港真靚貨」的台柱，同時亦開設了自家頻道，黃梓瑋說：「初初學嗰陣唔止淨係幕前，後台都要自己控制，好似幾時派福袋紅包，仲有點樣排品，全部係一腳踢自己做，但係好少人喺淘寶睇直播買嘢，想買嗰樣嘢咪直接點入去買，反而抖音嘅人係鍾意睇住直播去買，流量同成交都快，做抖音就好好多，排品，彈幕都有小助理做。我主力係香港藝人站，由零開始，拍片sell吓自己放上去推流，粉絲儲夠一定數目就開播，係一個一個粉絲咁儲返嚟。」
直擊黃梓瑋帶貨直播現場：
直播帶貨推流要靠成交量
黃梓瑋亦分享了小秘訣：「因為抖音係AI控制，如果佢認定你係娛樂播，唱吓歌同傾偈，佢淨係會派睇娛樂播嘅粉絲畀你，但係如果你做娛樂播又掛個小黃車做帶貨，佢就會撥咗你去賣貨嗰邊，但係賣貨係點樣推流呢？就係計你有冇成交，譬如喺15分鐘內冇成交，佢個流就唔推，但係如果有成交，佢個流就會double咁推啲粉絲入嚟，同埋分數都會影響個推流。」
收入方面，黃梓瑋坦言：「學嘢就喺淘寶，但真係搵到錢就係喺抖音。主要係拆賬，平台點都去咗你一半，以前淘寶為例，就係品牌方買俾主播係計幾個%，跟住例如買咗一件賺咗10蚊，平台都會殺咗一半，仲要報稅呢，其實唔係賺得好多，不過係多咗人認識。但係抖音點拆法就冇理，剩係同呢間公司拆，佢俾幾多我，我接受咪做，每次最少要做三個鐘，因為頭一個鐘要warm up，等人入嚟同推流量，到咗中間嗰個鐘，人流係最多，最後一個鐘，啲人會慢慢流失。」她還笑說：「其實仲有好多術語，我都邊學邊做，而且我啲普通話都得，咪唯有講港普，有時講到佢哋覺得好開心，我做係講笑多啲，有時會笑住鬧吓佢哋。有啲直播喺側邊會有好多小助理，佢哋會帶手講，我就係自己做，自己執貨、Set嘢，想講啲乜嘢，乜都自己嚟。有陣時啲留言好多，我又冇助播喺身邊，唯有叫佢哋留多幾次，好彩我已經做到有一班固定嘅粉絲，佢哋會幫手答，真係好好。」
受內地粉絲歡迎感滿足：嗌得出個名
問到收入好過做藝員？黃梓瑋坦言：「一時時，等於你開舖做生意，有時會好旺，有時都會唔旺。但係你問我，有時我哋喺度傾3粒鐘，可能只係賺得幾百蚊，但係你返去TVB，拍一場戲可能一個鐘搞掂，就執咗一個騷，呢樣就好難去釐定，所以冇得話邊度好邊度唔好，唯有盡做，但係如果你問我，拍劇定帶貨，我一定會揀拍劇，我始終都係喺嗰度出嚟，而且又係鍾意嗰樣嘢。不過帶貨就可以同啲粉絲近距離傾偈互動。」
黃梓瑋續說：「佢哋通常都會問你拍過啲乜嘢，咀戲係咪真係錫，有冇同邊個合作，好得意，又試過問我嗰陣同劉德華合作，佢好唔好人，其實佢哋有睇先會問，有啲我自己都唔記得。好似最近去咗內地，佢哋係嗌得出你個名，仲話有睇你抖音同電視劇，嗰種感覺真係好開心，好滿足，雖然喺香港佢哋會知你係邊個，不過除非你係一線，如果唔係都會覺得你係茄喱菲，有時係唔好受，但係都習慣咗，始終都做咗20幾年，但係你返咗內地，嗰種滿足係真係唔同。」
黃梓瑋同一時間經營兩個抖音帳號，因為語言問題，某程度上係有點局限，她說：「普通話唔得，再去遠啲有難度，你問我而家通咗關有冇影響？其實係有，尤其係我普通話唔好，侷限喺廣東省同大灣區，佢哋隨時可以自己落嚟買，但係好多粉絲話信我先買，唔去其他地方買，係開心。另一個號係生活化，有一個女仔幫我，每次都有人寫稿，大家會傾，睇吓內地嘅人想知道香港啲乜嘢事，又或者返內地去飲飲食食，去探店，介紹啲好玩好食嘅嘢，吃喝玩樂，有啲係即興，但基本上係一定要寫稿。每段片嘅內容都要試，睇吓啲網民鍾意啲乜嘢，慢慢拍開嘢，知邊啲嘢係唔會有興趣。」
獲內地樓盤邀拍廣告
再問會否向一線主播進發？黃梓瑋說：「其實冇話一線唔一線，都係好現實，成效高咪叫大主播，我都會朝住呢個目標進發，等於你拍劇，都希望可以上位，所以我哋要開多啲直播，拍多啲片，如果曝光率多咗，自然會有人問你，返內地商演同工作都係一個方向。本來有個樓盤活動邀請我演出，不過最後撞咗開工日期要取消，我一定會開劇為主。亦都試過有人問，有啲樓盤廣告可唔可以幫幫手，但係因為喺抖音同淘寶係唔可以直播介紹樓盤，亦都有啲贊助，有啲係拍片，但價錢唔係太好，仲試過有人搵我喺南沙做嘢，佢哋話想搵啲入屋嘅師奶，主力係sell鋼鐵，我都覺得奇怪，點解唔係要搵男人？」
黃梓瑋最初亦未有想過有這轉變：「冇諗過㗎，只係因為一個疫情，而令好多人生活方式都有轉變，但係我覺得OK，幾好玩，TVB返工咪返工，冇工開咪返嚟，有時都會偷懶去玩唔開播，當然方向係想上去，任何一樣嘢都想試，呢個算係自己宣傳自己方式，都可以算係一個新出路。」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應