古天后日誌｜港股是日牛皮窄波 暫難脫向下尋底格局

10月5日，大致天晴，日間天氣酷熱，但局部地區有驟雨。美國私營企業職位增長數字遠遜預期，美債息從高位回順，美股周三好淡爭持，表現反覆，但最終三大指數倒升收市，道指升127點；標指反彈34點，仍未修復4,300點重要支持；納指反彈176點。VIX有所回落，但仍然喺17以上，美國仍有一定回吐壓力。

小非農數字公布後，年底前再加息機率又回落至只有31%，星期五晚公布大非農數字及失業率更為關鍵，若失業率進一步上升，美聯儲無乜藉口加息。ISM服務業指數回落1%至53.6，訂單指數經過6個月回升後開始回落，企業開始放緩擴張。美股喺6月及7月大挾淡倉，但8月及9月到淡友發圍，做淡嘅對沖基金大舉出擊，單係9月標指累計跌近5%，道指則蒸發今年全部升幅，據S3 Partners資料顯示，沽空投資者單計9月賬面勁賺500億美元（約3,900億港元），創今年最佳表現。值得留意美國企業債於第4季陸續開始步入再融資期，明年第2季會進入高峰，一旦10年息長期企於目前高水平，美國企業再發新債續舊債嘅融資成本大增，當然唔係好事，唔排除又出現另一輪違約潮，成為空軍淡友做淡美股嘅最佳藉口，若然聯儲局仲唔醒水，不斷放鷹，淡友正中下懷。

港股假後復市兩個交易日跌逾600點

不過美股暫時估值過高係一個問題，前「債券大王」格羅斯（Bill Gross）於投資展望中認為，債息需大幅向下，股市先會重現吸引力，儘管目前債券投資亦唔係特別吸引，但喺經濟放緩或衰退下，相信表現會較為理想。

至於港股維持疲弱，假後復市兩個交易日跌逾600點，但技術指標顯示尚未到超賣水平，14日RSI昨收報37.4，未達30超賣區，而一般港股出現超賣後，日線RSI或要下調至20樓下先會出現較大幅度反彈，目前恒指仲有向下空間，短線維持尋底格局。即使短期反彈，喺缺乏成交配合下，暫時亦難重拾升勢，除非突然有重大利好政策出台利好消息帶動，可能最快要等到施政報告先會有機會。不過一日外資唔回頭，好消息刺激短暫反彈後，又係打回原形，維持有波幅，冇升幅格局。經過兩日下跌，今日可能牛皮，指數或於窄幅上落，但十個牛皮九個淡，港股目前仍難扭轉浪低於浪，持續向下尋底格局。

相關文章：

港股開市｜恒指高開54點 油價大跌逾5% 中海油中石油向下

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ