獨家丨區焯文導演激讚袁富華吳肇軒超晒班　《說笑之人》棟篤笑包裝逆境父子情

2023-09-14 07:00

演藝學院畢業、演員出身的導演區焯文，執導10年只有3部作品，他承認因搵資金唔容易，新作《說笑之人》以棟篤笑包裝逆境中的父子情。電影未上映，袁富華和吳肇軒已在芝加哥《亞洲躍動電影節》獲獎，區導盛讚兩人演出令電影加分，更感激Vivek Mahbubani 等一班棟篤笑高手跨刀相助，令劇本得以完成。採訪：杜杜

48歲的區焯文在演藝學院及導演會訓練班畢業，入行超過20年遇過不少低潮，但依然醉心編導演工作。

區導認為遇到兩位主角是恩賜，「對導演嚟講慳水慳力。」

區導對於《說笑》內的父子關係題材感受很深，「細個我唔明白爸爸，到佢退休先發現，佢為屋企付出咗好多，佢係中港車司機，為生計用啲唔合法途徑搵到車牌，延長到70幾歲先退休。」他強調犯法是不對，但讓他更了解父親的愛。而棟篤笑打動他就是苦中作樂的生活態度，「呢班表演者喺台上帶畀人歡樂，但背後可能捱緊世界要送外賣。」

袁富華和吳肇軒的精湛演出，已獲得海外獎項肯定。

袁富華要演繹輕度智障兼患柏金遜症角色，難度極高。

袁富華演感情戲一刀不剪

袁富華和吳肇軒在芝加哥《亞洲躍動電影節》（Asian Pop-up Cinema），分別榮獲演藝事業成就獎及璀燦新星獎，區導盛讚兩人演出令電影加分，絕對實至名歸，他最深刻袁富華一鏡過跟妓女訴說多年來委屈的感情戲，因太精彩決定一刀不剪，「現場環境好窄，鏡頭黐到好埋，好難演，但佢做到足慢慢流眼淚，就算技術上配合唔到，再拍第2次佢做得更好，佢畀咗好大恩賜呢套戲。」

吳肇軒是棟篤笑迷，戲中演繹亦似模似樣。

區導感激一班棟篤笑高手幫手寫劇本之餘，亦有參與演出。

吳肇軒演感情戲亦手到拿來，而最令區導驚喜是大部分棟篤笑戲，都一take過完成，「佢基本上係一字不漏講返出嚟，真係好難，NG只係就鏡頭，真正棟篤笑有晒現場氣氛同觀眾，會易啲講落去，但係拍攝對住部機講難度更高，佢真係超額完成。」戲中有不少棟篤笑戲份，區導坦認好難處理，「開頭度都覺得幾過癮，但係寫寫吓覺得瀨嘢，所以要求助，真係要多謝Vivek Mahbubani佢哋幫手完成。」