越洋獨家訪問 丨 68歲丹素華盛頓減45磅拍《叛諜裁判3》 拍外景快樂撩阿婆

丹素華盛頓主演的《叛諜裁判3：終極一戰》剛在港上映，作為最後一次演麥戈（McCall）實在好值得紀念，跟丹素作越洋訪問，笑談68歲拍打戲仲親身上陣，又提到在意大利拍外景行800級樓梯叫晒救命，遭當地90幾歲阿婆恥笑，更自爆在當地口花花撩阿婆的趣事，原來金像影帝份人咁鬼搞笑。撰文：廖思慧  攝影： John Russo  化妝及髮型：LaShawti Janifer 服裝： Linda Medvene  

丹素去完Atrani拍外景超鍾意，仲話要即刻打電話畀經理人，「幫我搵個廣告喺嗰度拍。」(笑)

為了拍《叛諜3》，丹素做了兩年準備，例如體形上的轉變，「2022年初開始減肥，搣甩大約30磅，後來再減多15磅。《馬克白》中有句對白，主角談到生命中的「黃葉」狀態，即係我𠵱家，不再年青。不過冇所謂，目前我身體、精神及心理都處於最佳狀態。我想知道自己的極限係咩？仲可以做咩？」

68歲日日練拳
戲中有大量埋身肉搏場面，全部由丹素親身上陣。「多年來，我一直有練拳。所以呢幾十年，仍可以拍打戲。」驚訝他68歲仍Keep住打拳，丹素笑言，「每朝起身，拳擊是我訓練的一部分。你要明白，我係人老心不老呀。」他再笑言，「我有位超強的替身演員，我叫佢做盡所有動作場面，然後將功勞都歸於自己(笑)。所以，打人的時候，仍是我親身演出！被打就通常是替身上陣！哈。」

麥戈在戲中愛上Atrani，見到壞人在當地蝦蝦霸霸，當然忍唔住出手。

無奈俾阿婆笑

丹素講到停唔到，提到在靚爆外景地意大利的Atrani有唔少奇遇，「要行800幾級樓梯先去到山頂教堂，但我個勞損膝頭畀我嘅感覺好似行咗1萬級樓梯，以為上山難，落山更辛苦，但有90幾歲婆婆從我身邊行過，佢哋將手放身後，好悠然咁上落長樓梯，好似同我講，『我日日都行，後生仔乜你咁虧？』」對於老婆婆，丹素好有感覺，「我又遇到一個好細粒，大約80幾歲的老太太，唔識英語，我搵人同佢講，佢係我新女友，然後婆婆拉住我好開心，大家都笑，原來婆婆回應我，「係呀，好啦，靚仔你係我新男友，我即刻帶你返屋企。」全場大笑。

丹素好鍾意到處都是葡萄、酒莊和檸檬的Atrani，「我覺得，我應該成為一名當地導遊（笑）。」

戲中Atrani市民合力擊退壞人，丹素希望觀眾能透過電影，感受到人情溫暖。

左邊是黑手黨大佬，又貪又惡，壞人當然冇好下場。

當麥戈開始與黑手黨抗爭時，報料畀狄高達芬寧飾演的年輕特工愛瑪。

拍攝最後一日，丹素冇攬攬導演，「我一向是安靜地，低調地閃人。」

《星島頭條》新網站有更多精彩內容：http://www.stheadline.com/