專欄｜感激支持 後會有期

搵返自己由今年2月開始，喺《星島體育》已經寫咗27篇專欄文章。今次第28篇，亦會係我最後一次同各位讀者喺呢度講波經啦。

因為嚟緊自身嘅工作安排，艾爾要暫時放低支筆，全力「閉關修行」。喺度先要感謝各位讀者，同埋收睇《猜波台》節目嘅咁多位觀眾，你哋畀咗好多鼓勵同建議，艾爾從中都學咗好多。

同我愛隊車路士一樣，艾爾接受咗唔同嘅挑戰，從來未試過嘅足球評述都涉獵埋。當然，我講波嘅經驗唔算太深，就好似古斯圖、馬特臣、梅迪歷等上陣經驗未太豐富嘅球員，過程中會有甩漏、有錯失。

不過，呢段時間艾爾不斷嘅摸索，聽咗各方面嘅意見，唔敢講去到爐火純青，但起碼都學有所成。

艾爾能夠行到嚟呢步，實在感謝Gary、馬高、Jo、Will仔、LingLing同小喬嘅提點同指教，幾位導演同樣幫咗好多，願《猜波台》台前幕後順順利利，亦希望Gary嘅「神蹟」繼續幫到各位。

今年我嘅愛隊好多嘢都好新，可謂萬事起頭難，初頭未必會咁如意，但只要搵啱方向，相信總會有轉機。艾爾希望各位讀者可以搵到屬於自己嘅路，盡情發揮，我哋後會有期！艾爾

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ