專欄｜進攻瓣數多瑞典可捧

女子世界盃已經嚟到16強階段，艾爾嘅爭冠心水德國未能晉級，係球隊參加9屆世界盃決賽周以嚟，首次喺分組賽出局，表現相當失望。雖然「轟炸機」波普姐嘗試力挽狂瀾，可惜莉亞舒娜、白蘭特等球員完全唔入局，戰術上亦唔係太多傳中球，不禁令艾爾多次大嗌：「各位絲打，斬入去喇！」

傷心過後，都要向前望嘅。今屆16強比較矚目嘅戲碼，一定係瑞典對美國。瑞典過去喺世界盃同歐洲賽都表現穩定，特別留意球隊副隊長阿絲蘭妮，呢位現時效力AC米蘭嘅34歲攻擊中場，派牌能力唔錯，係球隊不可或缺嘅核心。效力巴塞隆拿嘅左翼蘿爾法除咗樣靚之外，右腳嘅射門幾強，喺邊路策動唔少攻勢。當然唔少得「帶刀待衛」伊莉絲迪，今屆3場賽事因為接應角球而入咗3球，頭鎚爭頂相當殺食。

至於4屆冠軍美國隊，今屆狀態認真麻麻。剛戰唔係葡萄牙嘅攻門中柱，美國已經要提早執定包袱。事實上，瑞典上屆奧運曾經以3比0贏美國，對賽往績亦唔輸蝕，今次推介讓球受讓平半嘅下盤。艾爾

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ