專欄｜期望殘廢車亂後重生

亂，係上季車路士嘅處境，相信唔少車迷感受都好深。無論轉換班主、聘請領隊、球員收購、戰術運用，以至部分球員嘅「關公災難」，都係一塌糊塗，成績自然一落千丈。經過咁混亂嘅一季，呢架死咗火嘅車似乎撻得番着。

車路士近3仗熱身賽2勝1和，令艾爾安慰嘅係，球隊嗰團火返嚟喇！新加盟嘅尼高拉斯積遜，呢3場熱身賽2入球3助攻，單對單無問題，做支點亦得，同梅迪歷、馬達臣等球員嘅配合相當精采，希望佢可以為「前鋒墳墓」嘅車路士帶嚟轉機。

前綫組合有驚喜，中場都唔例外。嚟自巴西嘅安德烈山度士踢起嚟有紋有路，傳控組織幾淡定。意大利新晉球員卡斯迪表現都唔失禮，美中不足嘅係見唔到佢最煞食嘅高空轟炸。另外，喺白禮頓外借完返嚟嘅高維，同堤亞高斯華一老一嫩嘅配搭，相當令人期待。由里昂加盟嘅左閘古斯圖，喺白禮頓一仗面對三笘薰不落下風，希望新一季可以有同列斯占士咁上乘嘅表現。

目前車路士陣容相當年輕，經驗較為不足，但勝在有衝勁，球員有番信心同動力，加埋普捷天奴重整球隊嘅功力，希望今季呢架殘廢咗嘅車可以亂後重生。艾爾

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ