专栏｜期望残废车乱后重生

乱，系上季车路士嘅处境，相信唔少车迷感受都好深。无论转换班主、聘请领队、球员收购、战术运用，以至部分球员嘅「关公灾难」，都系一塌糊涂，成绩自然一落千丈。经过咁混乱嘅一季，呢架死咗火嘅车似乎挞得番着。

车路士近3仗热身赛2胜1和，令艾尔安慰嘅系，球队嗰团火返嚟喇！新加盟嘅尼高拉斯积逊，呢3场热身赛2入球3助攻，单对单无问题，做支点亦得，同梅迪历、马达臣等球员嘅配合相当精采，希望佢可以为「前锋坟墓」嘅车路士带嚟转机。

前綫组合有惊喜，中场都唔例外。嚟自巴西嘅安德烈山度士踢起嚟有纹有路，传控组织几淡定。意大利新晋球员卡斯迪表现都唔失礼，美中不足嘅系见唔到佢最煞食嘅高空轰炸。另外，喺白礼顿外借完返嚟嘅高维，同堤亚高斯华一老一嫩嘅配搭，相当令人期待。由里昂加盟嘅左闸古斯图，喺白礼顿一仗面对三笘薰不落下风，希望新一季可以有同列斯占士咁上乘嘅表现。

目前车路士阵容相当年轻，经验较为不足，但胜在有冲劲，球员有番信心同动力，加埋普捷天奴重整球队嘅功力，希望今季呢架残废咗嘅车可以乱后重生。艾尔

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ