星8卦｜「嬌嬌」迫婚不成隨時俾「太子爺」飛「男人婆」出現力追有着落

2023-08-01 11:30

但凡一段戀情拖太耐都無乜結果，唔婚就分都係百年不變嘅定律。「嬌嬌」最鍾意唔聲唔聲嚇你一驚，上次無端端自爆戀愛史，最衰係已經同「哥仔」玩完，搞到啲客戶反晒枱，係咁同經理人公司要求賠償，因為對形象有損，佢都自己賠咗2,300萬，好鬼入肉㗎。

自此佢更加唔肯將自己啲私隱亂講，好似同「太子爺」拍咁耐拖，都無正面承認過，但用咗好多方式公告天下，因為條仔好樣又有錢，成班朋友幫忙令「太子爺」上釣，真係得來不易。兩個人初時好恩愛，但畢竟個男仔太年輕，鍾意玩同識女仔，呢兩年都唔係好覺佢哋有乜親愛照公開，聞說「嬌嬌」想結婚，「太子爺」覺得仲要玩下先，娶佢無所謂，但就唔係而家囉，所以搬父母出嚟拖住先。

最近「嬌嬌」身邊出現咗個「男人婆」跟出跟入，仲做埋經理人咁幫佢接Job，有次「嬌嬌」請人喺高級酒店食飯，「男人婆」跟埋嚟，嗰餐飯找數都要幾萬蚊，「男人婆」唔出聲就幫佢埋咗單，仲即場錫咗「嬌嬌」一啖，「嬌嬌」表現好冧，完全唔抗拒，大家私底下都話唔通「嬌嬌」雙邊投注，「太子爺」嗰邊甩碌，就靠「男人婆」補飛，一定有着落？！