星8卦｜「娇娇」迫婚不成随时俾「太子爷」飞「男人婆」出现力追有着落

2023-08-01 11:30

但凡一段恋情拖太耐都无乜结果，唔婚就分都系百年不变嘅定律。「娇娇」最锺意唔声唔声吓你一惊，上次无端端自爆恋爱史，最衰系已经同「哥仔」玩完，搞到啲客户反晒枱，系咁同经理人公司要求赔偿，因为对形象有损，佢都自己赔咗2,300万，好鬼入肉㗎。

自此佢更加唔肯将自己啲私隐乱讲，好似同「太子爷」拍咁耐拖，都无正面承认过，但用咗好多方式公告天下，因为条仔好样又有钱，成班朋友帮忙令「太子爷」上钓，真系得来不易。两个人初时好恩爱，但毕竟个男仔太年轻，锺意玩同识女仔，呢两年都唔系好觉佢哋有乜亲爱照公开，闻说「娇娇」想结婚，「太子爷」觉得仲要玩下先，娶佢无所谓，但就唔系而家罗，所以搬父母出嚟拖住先。

最近「娇娇」身边出现咗个「男人婆」跟出跟入，仲做埋经理人咁帮佢接Job，有次「娇娇」请人喺高级酒店食饭，「男人婆」跟埋嚟，嗰餐饭找数都要几万蚊，「男人婆」唔出声就帮佢埋咗单，仲即场锡咗「娇娇」一啖，「娇娇」表现好冧，完全唔抗拒，大家私底下都话唔通「娇娇」双边投注，「太子爷」嗰边甩碌，就靠「男人婆」补飞，一定有着落？！