古天后日誌｜政治局會議刺激港股 惟中國經濟缺水 散戶追升跌無意思

港股｜7月25日，大致天晴，日間天氣極端酷熱，氣溫高達35度，稍後局部地區有驟雨。隔晚美股三大指數做好，道指升183點；標指跟納指則分別升18點及26點。雖然Tesla因被券商調低投資評級，股價曾跌逾3%，但最終收市則倒升3.5%，反映美國股市氣氛仍高漲。另一方面，有消息指蘋果要求供應商今年生產約8,500萬部iPhone15，數量跟去年相若，蘋果股價升0.4%。至於石油股表現理想，佛龍(Chevron)業績勝預期，股價抽高2%，埃克森美孚亦漲1.6%。至於銀行股個別發展，高盛升2%、摩通亦升2%，美國運通則回落1.4%。

暫時美股仍然高位徘徊，市場氣氛保持樂觀，呢個星期聯儲局跟歐央行議息，預期兩者均會加息0.25%。不過7月歐洲製造業PMI跌至42.5，創疫情以嚟新低，亦較預期43.5低，除咗製造業不景氣外，服務業PMI亦降至51.1，係年初以來新低，反映經濟活動正放緩，持續加息已有效抑制通脹，預期無論美息或歐息均將見頂。

至於港股隔晚喺ADR及夜期表現神勇，重上19,000水平之餘，更一舉收復10日、20日及50日移動平均線。港股隔晚急升，主要係市場對中央政治局所發通告內容反應正面，認為內容利好市場，包括1. 資本市場由平穩運行，變成要活躍資本市場。2. 放棄「住房不炒」字眼。3. 地方債由「嚴控新增隱患」，變成「有效防範風險」。4. 匯率中提及要保持在合理穩定。5. 強調AI要安全發展，用推動數字經濟、製造業及服務業的深度融合。6. 擴大消費，上至汽車、家電，下至體育休閒、文化旅遊都要扶持。

如欠資金 再多口號也淪空談

反映其實呢啲內容了無新意，都係口號多過一切，內地經濟問題並非叫幾個口號可以扭轉目前劣勢，重點係缺水問題未能解決，缺乏資金去幹實務，再多嘅口號都係空談。

預計今日港股將跟隨夜期高開，但能持續高開又高走就係另一回事，始終250日線由之前嘅支持變成阻力，至少要收復250日線，港股先有機會講轉勢，本周五期指結算，喺結算前指數又再度拉升，港股仍然未走出18,200至19,600呢個上落區間，呢個月上下波幅唔算大，但又上又落，北水繼續彈出彈入，大戶就係玩住個指數，散戶追升追跌根本無意思，呢啲市好難說服到資金入場買貨坐定定，只能繼續打游擊。

相關文章：

港股市況｜政治局會議釋7大信號 港股午後升逾700點 中資股集體飊升

中央政治局會議無提「房住不炒」 花旗：為房地產打開大門 料GDP全年增5%

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ