張致恒面容憔悴小食店打工被捕獲 肯賺錢養家獲讚好過Nathan周永恆
2023-07-16 23:45 
張致恒(Steven)不時被封為「離婚界KOL」嘅老婆雯雯公開鬧爆「又廢又懶」，但日前雯雯又突然承認懷有第4胎，而且BB快將出生。近日Steven現身受訪時承認為咗照顧家人被逼孭到周身街數，試過申請過綜援不過失敗。
在訪問中Steven透露自己為養家，做過洗碗、酒店侍應、藝人演出中介人等，𠵱家有固定嘅工作，每周4天到小食店打工，今日有網民在天水圍一間售賣重慶小食嘅小食店捕獲Steven踪影，圖中見戴住漁夫帽、手套及圍裙嘅Steven鬚根滿面，面容帶點憔悴工作中，但面對鏡頭仍然敏感地望過去。
雖然近年張致恒被網民狂鬧係「渣男」，但見佢願意打工幫補生計，對他有改觀。有網民留言叫Steven加油畀心機做，指他和被控刑事恐嚇老婆Britni嘅周永恆(Roy)及不停問女友Jessie(生前)借錢嘅《全民造星V》退選者魏念恩(Nathan)比較，指他算係好男人。網民仲為他抱不平：「唔好搞人哋啦，大佬」、「咁佢起碼肯賺錢養家」、「幾好，靠自己工作賺錢家有咩問題？」、「肯做嘢算係咁」、「放過人哋啦，大家都係有故事的人」、「做埋啲垃圾工都好過喺屋企等人養」、「畀條路人行啦沒必要趕盡殺絕」、「最少佢肯踏出第一步，好事嚟」、「馬死落地行，我反而欣賞佢」最搞死有網民話、「支持你，少辣！」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應