獨家丨顏仟汶厭惡被指艷星參加《中年2》洗底求唔好踩多腳：畀條生路行吓

2023-07-12 07:00

隨著《中年好聲音》的成功，《中年2》成為唔少圈中人的「翻生平台」，包括入行34年的顏仟汶。在TVB 7年曾跟影帝劉青雲、周星馳、黎明等合作，52歲的她不甘觀眾只記得她拍過3級片，曾是艷星，故鼓起勇氣參賽，為自己大平反，更跪求觀眾：「大家鍾意咪畀兩吓掌聲，唔鍾意都唔好踩多兩腳。」採訪：方騫平場地：White Stag@灣仔

失婚的顏仟汶感情生活一片空白，眼前最重要係自己、家人、朋友及愛貓身體健康。

顏仟汶患上抑鬱症8年，因為壓力太大，就算填好晒《中年2》網上表格都猶疑不決，事隔一排才撳傳送，所以激讚自己已贏咗勇氣。不過，參加海選時仍驚到手震兼麻痺：「參賽跟登台係兩回事，登台主力係搞氣氛，比賽要喺短短幾分鐘內，表達到歌曲訊息及感情。」

顏仟汶跟歌手除Kimman(左1)、林若盈、前港姐戚黛黛、呂良偉弟弟呂良國參加《中年2》海選。

患精緒病8年的顏仟汶，做晒心理準備，令心臟強大才夠膽報名參賽。

她最想話畀大家知係識唱歌。

近年顏仟汶主攻內地登台搵真銀，累積唔少知音。

拍劇多過拍3級片

15歲曾參加《新秀》，1989年，19歲的顏仟汶於TVB藝訓班畢業，同學有林家棟及黃德斌，1996年離開TVB後一度退出娛樂圈，98年轉投ATV，再因替雜誌拍性感照被炒，只做咗10個月亞視人。由2000年開始，4年內拍咗《獸性新人類》及《色慾中環》等20多套3級片成為知名艷星。對於名字長期連住3級片，她不甘反擊：「我喺TVB拍過多套劇，近年劇作《一舞傾城》、《家族榮耀》、《黑金風暴》、《獅子山下的故事》都被讚，讚我喺《一舞》媽媽生角色演得入型入格；《家族》客串3場戲都肯演…但無奈又係focus嗰20幾套電影，都係20幾年前嘅事啦。」

1990年顏仟汶(藝名亦羚)演《孖仔孖心肝》，跟未成巨星的星爺合作。

31年前跟嫩口鄭伊健演TVB劇作《九反威龍》，當年伊健只有24歲。

在亞視10個月，曾跟劉松仁、曾江拍過《縱橫天下》，飾演要晒事業線的「四姨太」。

21歲時劇作《新重案傳奇》。

《血濺塘西》

演過《壹號皇庭》。

在《家族榮耀》中客串3場戲，演李彩華媽媽生前好姊妹芳姨。

《一夜傾城》中顏仟汶壓低聲線演活「媽媽生」「曼莉」。

唔會理網上留言

內地登台期間，顏仟汶曾獲讚聲音具辨識度、能唱出人生經歷、甚至指她是被演戲耽誤的歌手，既然得到鼓勵，決定勇敢踏出一步，畀觀眾知道她唔止識演戲，唱歌都好好聽，勿再以艷星標籤她：「我夠知呢個(3級女星)翻到身，嗰個翻到身，得我未翻到身，但我唔會死囉！唔會少一條毛，我同自己講，有朝一日啲人會自動自覺唔寫嗰啲嘢，因為有其他嘢寫…」由於TVB節目入屋，顏仟汶最擔心參賽被「艷星身世」所累：「以前試得多，完全抹殺咗我嘅努力及演技，唔應該被框住，呢啲喺外國邊係嘢？咪傻啦！今日我企得好硬淨，但返到屋企會有軟弱時候，畀條路我行吓，大家鍾意咪畀兩吓掌聲；唔鍾意可以唔好投我票，但唔好踩多兩腳，我唔會理網上留言，要記住只係虛擬世界，何必咁認真？就算係讚你都唔好信啦。唉！呢個世界經已好亂，大家發放多啲正能量啦，《中年好聲音》點解咁收得？咪係正能量囉，大家為夢想去做一樣嘢。」

顏仟汶與王書麒於《發電俏嬌娃》中，有唔少露兩點牀上激戰戲。

年輕時顏仟汶好進取，經常着泳衣亮相爭取曝光。

當年為咗支付患癌爸爸的醫藥費，顏仟汶加入脫星行列。

52歲的顏仟汶不論身形及樣貌都Keep得唔錯。

呼籲關注抑鬱症

雖然演藝生涯多難關，但顏仟汶冇後悔走過嘅路：「嗰個階段係老天爺嘅安排，做乜要後悔？就算蓋棺嗰日個Box係咁寫都係定律，呢行係要包埋嘅，但我對得住天地良心，靠自己求生，冇做對唔住任何人嘅嘢。」經歷過高低潮的顏仟汶，形容有精彩人生，患情緒病時喺瑪麗醫院急症室爆喊，細細個的經歷已豐富到足夠寫自傳。最後，食緊情緒藥的她呼籲大眾要關注抑鬱症：「香港地少人多，步伐急速壓力太大，有病要去正視，大家亦唔好戴有色眼鏡睇抑鬱症病人，反要畀多啲正能量包容多啲，呢個世界一環扣一環就會變更美好。」