獨家丨22歲「A0男神」溫湯馬仕曝光多過MIRROR ViuTV力捧Jeffrey 2.0一年七個節目

22歲中英混血兒溫湯馬仕（Thomas Windle），去年參加ViuTV真人騷節目《戀愛Staycation》第二季，憑高大靚仔兼廣東話非常唔流利吸引觀眾注意，後來簽埋ViuTV做親生仔。入行未夠1年，Thomas曝光多過唔少鏡仔，參與7個節目之多備受力捧，殺食外形隨時彈起成為第二個Jeffrey（魏浚笙）。因為首做訪問，單純又搞笑的Thomas咩都夠膽講，自爆媾女史及最近遇女神再力媾經過，分分鐘可一不可再。採訪：杜杜 服裝:服裝credit: @agnesb_offical

Thomas中文唔叻但賣口乖超勁，訪問完再問他感覺，「好玩呀！鍾意咁樣傾偈，鍾意同你做訪問，唔知其他係咪都係咁好。」嘩！冧死人咩！

Thomas去年在《戀愛》後，接着拍《波係咁踢》、《今餐有料到》和《異鄉留民2》，今年上半年已參與了4個節目，好似逢周四晚播出的《MM730-傾 of the World》。

Thomas拍住泰山主持《準時開飯》，雖然經常被窒，他解釋事前夾好，泰山亦教識他好多嘢。

Thomas在《癮營人》同嘉盈、許賢拍檔主持，最初中文唔好難溝通，但多得大家對他好包容。

做《初戀Action！》嘉賓要跟葛綽瑤和許寶恆談情，但因是真人騷不用記對白較輕鬆。

做《初戀Action！》嘉賓要跟葛綽瑤和許寶恆談情，但因是真人騷不用記對白較輕鬆。

由於Thomas首做訪問，記者封利是給他，祝他順利，令他相當驚喜，「開心收到利是，開始（訪問）有啲緊張，不過幾開心有機會畀新朋友認識我。」為測試其中文程度，訪問前先要求他用中文填寫個人資料，包括中文名、生肖及女性最性感部位等。但Thomas只睇得明個「名」字並寫上英文名，得知要寫中文即面露慘情樣，再於英文名旁寫上唯一識寫的「我」字，因為完全睇唔明表格，又寫唔到中文，只能靠PR輔助再靠畫圖表達，象形文字Form相當搞笑！

Thomas收利是勁開心，仲以為每次訪問都會收到，知道真相後就話：「下次我畀返利是你。」

身為中英混血兒的Thomas，返了老家英國升讀大學。

感激陳俞希引薦做親生仔

Thomas雖然在香港長大，但一直讀國際學校，再到英國讀大學，平日只有媽咪跟他用中文溝通，目前讀寫中文是零，但聽得明廣東話。由於中文差，唱歌、跳舞又唔叻，雖然中學時好鍾意drama class，想大啲入行的Thomas冇諗過參加《全民造星》，直到見到《戀愛Staycation》廣告，「我讀BM、Marketing，但冇興趣做呢啲，媽咪做生意，唔係好想跟住佢，上網見到《戀愛》廣告，嗰時啱啱冇工返，諗住試吓。」本來拍完節目就算，多得主持陳俞希（Hailey）主動DM他，「話我有potential，叫我同金生個老細傾吓偈，如果Hailey冇搵我，唔會入呢行，多謝咗佢好多次。」

要用中文填個人資料，Thomas即露出慘樣。

Thomas只識寫一個「我」字，見到成篇象形文字自覺：「幾proud！」仲影低留念，睇吓大家又估唔估到佢寫乜。

Thomas在《戀愛》中的A0身份成討論焦點，他都自知冇人信，「好多人都話我冇可能係A0。」叫他填表寫初戀年齡，他畫一個人瞓牀代表單身，他坦認有玩dating app，仲俾朋友笑易沉船又識唔到女朋友，「最耐一個月半（個半月），傾偈出吓街。」他強調唔會同時間約其他女仔，「我同嗰個女仔傾偈，就唔會同其他女仔，會畀晒心機佢，等佢唔鍾意我，我唔鍾意佢，完晒。」他在《戀愛》跟彭泳熙（Hei Hei、月巴）配對成功，Thomas覺得同對方幾夾，也想過跟對方發展，「佢都幾搞笑，佢打嗰個機我都一樣打，都約咗幾次想同佢出街，不過佢都last minute放我飛機，成日話要返工，節目佢係好人嚟，唔想見佢一定會同我出聲。」

Thomas在《戀愛》跟Hei Hei配對成功，但之後未能順利發展。

Thomas（左二）外形冇得輸，確實好難令人相信是A0。

七欖遇混血女神主動搭訕

以為Thomas係媾女可憐蟲？他自爆3月時睇七人欖球賽遇到女神，當時他跟朋友去買酒飲，等朋友去廁所時女方經過即中招，「我未見過女仔咁靚，佢係Brown嘅頭髮，着緊cow girl（造型），唔係好sexy係好cute，我鍾意cute啲，同埋佢幾高有170幾（cm），一半泰國一半German，喺香港出世。」之後他主動搭訕，「我Hi佢，覺得你好靚，我好少咁樣，你會唔會想買支酒同我傾吓偈，跟住佢話『想返屋企，同埋我都唔識你』，我話你畀機會識我啦，佢話『好啦好啦買一支啦』，我哋傾咗好耐，好似一個鐘頭過（過一個鐘頭），冇晒酒，佢話可以買多杯，我嗰時都幾大膽，可能飲咗酒，跟住我同佢bet，你（鍾意）嘅team（欖球隊）贏我就錫你一啖，我（鍾意）team贏你就要錫我一啖，佢話係咪都係我贏，哈哈！」

Thomas在七欖當日以這身啦啦隊造型都媾到女。

Thomas仲風騷以「Miss A」作為女神代號，兩人keep住約會，更去到拖手兼錫錫地步，「係第一個女仔咁close。」但他堅稱未表白唔算女朋友，不過他仲未夠膽表白，因為之前曾經問過女仔做佢女朋友被拒絕，「搞到我都驚咗，好驚畀佢reject，等我confirm咗先。」他又大讚「Miss A」除了靚，性格仲好好，因為他鍾意女方有禮貌，隨性又愛探索世界，仲甜到漏話：「已經係Miss Perfect。」Thomas表示唔會掛住媾女，會努力學好中文，希望有機會演戲，未來可以同偶像周星馳合作。

Thomas最近去了泰國旅行，IG po了一段片中見到他跟一個着人字拖的女仔玩腳踏腳，疑似「Miss A」。

Thomas最近去了泰國旅行，IG po了一段片中見到他跟一個着人字拖的女仔玩腳踏腳，疑似「Miss A」。

 

《星島頭條》新網站有更多精彩內容：http://www.stheadline.com/