古天后日誌｜港股十字路口徘徊 若再失平均線繼續尋底之旅

6月12日，天氣炎熱，有幾陣驟雨及風雷暴，日間短暫時間有陽光。美股上周五保持升幅，但三大指數小幅高收，道指升43點；標指升4點；納指升20點。本周四凌晨聯儲局將會有議息結果，市場預期今個月唔加息，焦點係鮑爺會後聲明，會唔會對息口路徑透路更多，暫時市場估計息口短期見頂，美股偏強，但標指喺4300-4400阻力甚大。

美股貪婪指數升至77，呢個數值反映市場極度貪婪，唔少散戶湧入Option市場猛追call，市場氣氛熾熱下，都盲目地樂觀睇升，風險偏好極高，VIX跌至13.5超低，但大戶未見喺option市場開價有所提升，小心一旦走勢逆轉，美股表現將會出現反差。

美匯指數回落至103.5，短期估計美元仍會喺100至105之間上落，環球資金流較為混亂，不過虛幣市場充斥負面消息，資金從虛幣亦場流出，造就美股近日愈升愈有，表現硬朗。只係虛幣市場弱勢，令資金風險胃納下降，納指能否持續高企，仍有待觀勢，時刻提高警覺，美股隨時轉勢。

中概股忽升忽跌難以捉摸，金山雲見公司高層增持，股價一度高開逾兩成，但獲利盤湧現下，升幅收窄至只有7.7%。蔚來汽車同樣見走勢出現極大落差，在公佈第一季度業績後，管理層有信心下半年毛利率會回升，仍有信心在未來一年內由虧轉盈，股價早段曾急升逾一成，但高位又見沽盤湧現，最終倒跌0.77%收市。蔚來一直被指喺電動車淘汱賽中嘅輸家，公司除咗銷售表現欠佳之外，現金壓力亦大。

阿爺下調息率，上週內房股全面反彈，阿爺有心救樓市，今年按揭利率已多次下調，搞到銀行按揭接近無錢賺。唔排除阿爺會調低MLF借貸利率5至10BPS，令銀行有多返些少潤空間，從而更積極放貸。A股上週五有輕微反彈，成交亦回升至9896億元近期偏高水平。不過A股仍然偏弱，某程度上拖累港股進一步反彈。

港股結算後開始反彈，上周恒指回升至19389，卻未見資金高追，成交連續3日回落至850億水平，市況極為淡靜，基本上係升又無人追，跌又唔見有貨沽，資金目前取向相當「佛系」，說穿了，就係港股已成棄嬰，升跌都無人理會。成交縮水，港股陰乾，睇嚟呢個悶局要維持一段時間，話唔定出現橫行，長時間窄幅橫行，要有大戶慢慢收集，港股就或者進入牛一收集期，但依家都係五五波，一旦又下穿10日及20日平均線，港股都要繼續其尋底之路。