獨家丨陳國峰為養家收5位數打拳 效力TVB 13年月入幾千爭落一身債

2010年參加《超級巨聲2》入行的陳國峰(Penny)，前年7月疫情期間，跟TVB由經理人合約改為基本藝員約，因為工作量唔多，每月收入只得幾千蚊，一度要向圈外朋友借6位數(超過十萬)應急養家，辛苦捱咗年幾，趁下月約滿決意離巢。賣身13年，Penny換來一身債，但他無怨無悔：「我賺到嘅係經驗，有錢都買唔到嘅。」採訪：方騫平

陳國峰操到一身結實肌肉，唔打得都睇得。

拳賽後翌日Penny同TVB完約，迎接一個新開始。

積極練拳。

最初打到冇晒氣。

豁出去全力以赴。

Penny喺《超能使者》中演大反派，好有發揮。

陳國峰拍劇唔多。

陳國峰將於下月13日出戰亞洲心動娛樂(AMM)舉行的《宇宙榮耀搏擊拳賽》，40歲的Penny以參賽拳手身分，挑戰僅22歲，高頭大馬的職業籃球員兼籃球教練陳耀燐打明星賽，決一高下。

Penny跟年紀細18年嘅職業籃球員陳耀燐打明星賽。

亞洲心動娛樂董事賴彩雲博士(中)舉辦《宇宙榮耀搏擊拳賽》。

擂台上豁出去真打

8年前，Penny為操Fit身形而練拳，跟志同道合嘅羅孝勇、謝東閔一齊玩。他自爆今次打拳賽，除機緣巧合獲朋友推薦外，絕對係為咗份酬勞：「見有5位數(萬元)出賽費，咪當係接份有錢job，又可以做吓運動囉，𠵱家我豁咗出去，上到擂台就嚟真，連樣都唔理，就算硬食兩吓，都要竭盡所能反擊返對手4拳，就算輸都唔好輸得咁肉酸。」問到會否好似林作咁採取逃跑戰術？Penny卻力撐對方：「擂台上千變萬化係要打技術，逃跑都係策略，也需要氣力。」

呢招起飛腳有板有眼，狀態大勇。

打拳迎接新開始。

練拳初時傷痕纍纍。

原來打拳好辛苦。

陳國峰大讚林作前年擂台上作戰鍾培生，策略得宜。

周身瘀傷老婆擔心

40歲的Penny撐林作因為感受到練拳之痛：「大家都知我乜年紀，平日只係踼波及做Gym，冇做開劇烈運動，最初用死力對打分幾鐘，已經打到『爆呔』(冇晒氣)，𠵱家協調到呼吸，可持續打3分鐘。」Penny育有2子，圈外老婆黃思雅（Wing）會否擔心他出賽？他輕鬆說：「佢表面話唔驚，我唔知佢內心點諗，不過，佢有時見我操完拳周身瘀傷，返到屋企成個人散晒，就會有啲擔心問『你得唔得㗎？』另外我唔建議年老媽媽捧場，始終身體髮膚受諸父母，但老人家堅持一定會到，暫時未知囝囝會唔會嚟，咁都好嘅，希望藉此以身作則，唔好做一樣後悔嘅事，有機會就要好好把握，做啲值得回憶嘅事。」

Penny一對囝囝只得5歲和3歲，老婆Wing都有工作分擔生活費。

阿媽都話要嚟捧場支持。

陳國峰兒子都愛打拳。

疫情下點都要想法子養妻活兒。

冇興趣參加《中年2》

提到第5波疫情嚴峻時，Penny兩公婆手停口停，經濟拮据，父親又因病去世，雪上加霜，好彩有「兄弟幫」老友 (林盛斌)等施援手，同時，他坦言有向圈外朋友借6位數應急，目前仍未有能力還債。當問到可有後悔賣身TVB 13年？他承認在TVB多年，有段時間失望及徬徨過：「但賺咗好多人生、工作、演戲經驗，有錢都買唔到。我相信人要向前行，唔可以停留太耐，去另一個地方，總會有出頭天，就算離巢都唔可惜。」Penny曾下定決心，40歲要做一件有意義嘅事：「加上拳賽後翌日同TVB完約，好似上天畀我一個新開始，將來仍然會keep住唱歌，接吓商演，邊做健身教練去尋找機會。」

第5波疫情時Penny兩公婆手停口停，父親又因確實去世。

Penny開個唱時，《兄弟幫》一班兄弟撐場。

兩年前疫情期間，Penny首當男一跟孫慧雪拍港產片《愛‧還記得》。

好兄弟阿Bob有情有義。

冇咗J2《兄弟幫》節目，陳國峰收入大減。

另外，兩年前Penny曾報名參加《聲生不息》但被指年紀大，報名被拒，問他會否參加《中年好聲音2》圓歌星夢？他有所保留，尷尬婉拒說：「機會留返畀外面嘅年青人，等佢哋見識吓TVB係點，唔使預我喇…」

Penny及劉威煌分別是《巨聲2》及《巨聲1》隊長。

兩年前Penny曾報名參加《聲生不息》，最後因年紀大被拒而發文表達不滿。

陳國峰仲有歌星夢。

首屆《中年好聲音》反應好好，最終由周吉佩(中)奪得冠軍寶座。

《星島頭條》APP經已推出最新版本，請立即更新，瀏覽更精彩內容：http://www.stheadline.com/