古天后日誌｜中資力托外資走人 港股難有大作為

4月19日，大致多雲，有驟雨及狂風雷暴，間中雨勢頗大。美股持續反覆，企業業績公布左右大市，美銀及強生業績又好過預期，令美股早段高開，但銀行股出現回吐，令美股又轉升為跌，最終三大指數，只有標指仍錄得3點升幅，道指跟納指則分別跌10點及4點。標指逼近4200阻力未能進一步突破，暫時喺高位整固，資金傾向低吸多於高追。

以強生為例，業績好過預期，更上調全年業績指引，盤前股價一度升3%，但高位沽盤湧現，收市倒跌2.8%，反映資金高位沽貨套現，業績好亦唔願意高追。相反，高盛營收及盈利均低過預期，股價盤前一度跌4%，但即見買盤趁低吸納，收市跌幅收窄至1.7%。Netflix同樣情況，營收遜於預期，股價盤前一度大跌10%，但又見資金低吸，結果股價由跌轉升。目前美股就係咁，高追免問，低位有買盤吸納。

其實美股點解逢低有買盤吸納，主要係市場認為喺美國經濟有可能陷入衰退下，大有機會聯儲局會提早減息，依家係資金趁低買定博減息時，美股喺第三及第四季炒上。其實美國經濟確未至於太差，只要睇返就業市場表現，就知美國實體經濟未至於太差，最近銀行業公布業績大部份都優於預期，已預示咗美國經濟未必會陷入衰退。但喺防範於未然下，聯儲局停止減息係必需嘅，至於減息則言之尚早。

至於港股呢邊，乏善可陳，目前情況下中資力托，唔想個市向下，偶爾就發出啲利好消息，好似噚晚阿里(09988)忽然間喺美股盤前時段做好，原因係監管結束之餘，大幅減少對螞蟻嘅罰款，不過呢個消息只係帶動阿里升咗一陣，結果反映中概股表現嘅金龍指數，都係升唔起。金管局再承接港元沽盤，反映有資金流走，外資持續減持，話之你中資力托亦唔畀面，事實上港股早已令市場信心盡失，尤其係去年監管風暴，已令外資對中概股嘅監管風險怕怕，有機會見股價好返啲都走人套現離場，已無意再同你坐定定做長線投資，試問一個咁嘅股市，仲可以吸引到乜嘢資金入場。