古天后日誌｜股份炒高即見配股或減持令資金卻步唔入場

4月18日，大致多雲，短暫時間有陽光，間中有幾陣驟雨，早段局部地區有薄霧，日間天氣炎熱。隔晚美國銀行股繼續公布業績，不過道富銀行業績強差人意，拖累股價一度急跌17%，其他銀行股亦走弱，美股早段亦見下跌。不過午後低位有買盤吸納，三大指數轉跌為升。道指升100點，標指跟納指分別升13點及34點。標指升穿4100阻力位後，目前在此水平整固，不過4200至4300阻力較大，要待更好消息方有機會向上挑戰。

銀行股經過3月嘅擠提風波，存款藜 個大轉移，大型銀行存款增加，中小型銀行存款流失，中小銀行要增取存款回歸，定必加存款利率先有吸引力，是固中小型銀行息差壓力或上升，中小型銀行業績，或待下一季方能見真章，目前銀行股都係買大唔買細。不過市場對銀行危機憂慮減退，目前亦未見再有SVB事件再出現。

另一個影響美股走勢嘅因素係美元強弱，喺去年10月美匯指數升至115後轉向，美股亦同步展開反彈浪，至2月份美匯指數未有進一步突破100心理關口反彈至105水平，美股再度轉向。暫時美匯指數似喺100至103之間徘徊，美股表現亦較反覆。美股目前係高位整固，每當美股見回吐，即見資金入場，美股係逢低有資金吸納，情況好過港股多多聲。

至於港股缺水問題持續，噚日恒指曾升至20800水平，原因係夏寶龍訪港，一句港股繼繼續炒，加上周二到訪港交所，中資積極入場。另一方面，積金局或調整供款上限，即係局你供多啲強積金，帶動盈富基金(02800)罕見地成為最大成交額股份。港股已企穩多條移動平均線，理論上係繼續向高位進發，只係現水平再入場追貨，上面有幾多空間畀你走位係一個問題。外資一直減持股份，即使港股喺二萬水平，估值唔算貴，外資一樣照沽可也，而較早前恒指跌至19000水平，亦未見大量資金流入趁低吸納，莫非到接近21000先嚟追貨，斷估外資唔會咁好死。

尋日大市成交額略增至1365億元，較近日平均數1100-1200億元稍為增加，但去年3月港股低位回升，成交額係增至2000億元以上，去年11月上升，成交額亦達1700億元，但目前成交額長期徘徊1300億元以下，反映一直未見新資金流入。尤其外資連返減持套現，噚日卒之到阿里(09988)亦忍唔住大手沽商湯(00020)。而噚日安踏(02020)亦宣布折讓8.8%配股集資；藥明康德(02359)亦計劃減持A股，欲套現70億元。凡此種種畀人嘅感覺就係股份一炒高，就有人趁機減持或抽水，咁嘅情況邊個傻仔肯同你買貨坐定定，韭菜被割得多都會覺醒，資金唔願入場，港股呢即使由19800點升上嚟，都係無成交配合嘅乾升，呢啲升勢可以有幾持久，大家心中應有數。