初選案｜趙家賢作供指對初選記者會全不知情 民動被排除在外 

民主派47人參與「35+」初選，涉嫌爭取立法會過半無差別否決財案被控，16人否認串謀顛覆國家政權罪。趙家賢今午於西九龍法院憶述3月26日戴耀廷區諾軒召開初選記者會前全不知情，「民主動力當時完全排除在外，完全冇角色」。趙坦言獲交托民動後，「我有個使命係繼續將個組織維持運作」，但「如果之後工作由戴耀廷做晒、獲得授權嘅話，民主動力壽終正寢，唔需要有任何工作」。 

接新聞直播通知方得悉記者會

副刑事檢控專員萬德豪主問下，趙家賢提到3月26日戴耀廷區諾軒等召開初選記者會，自己當時收到新聞直播通知才知道，事前並不知情。翌日民主動力Facebook 分享了朱凱廸帖文，其中一句指「香港民主派在議會過半，代表香港人選擇與中共攤牌」，趙家賢否認此屬民動觀點，分享帖文只因文章交代了部分記者會重點。趙家賢解釋「因為呢本身3月26日個記者會呢，你都會見到陣容好重量級嘅，唔同嘅版塊同專業界別功能組別立法會議員陪同戴耀廷區諾軒出席會議，而其實我哋民主動力冇收到任何邀請」。趙家賢續指想帶出整個協調的轉變，憶述記者會前後「區諾軒同我講戴耀廷獲得民主派元老嘅充份支持，即係民主動力當時係絕對冇獲得授權做任何協調角色，我哋再知道3月26日記者會之後當然要了解下各方面情況係點樣」，趙家賢坦言「呢個Facebook 帖文叫做向公眾睇到民主動力好似喺呢件事有跟進到，其實網上個做法叫做只係吸like，變咗公眾唔知道民主動力當時完全排除在外，完全冇角色」。李官問道「你感到尷尬？」趙家賢同意指李官「形容得好準確」。 

《國安法》指定法官李運騰回溯3月19日民動Facebook 帖文《民主動力 : 有關立法會協調工作及回應民間要求初選安排的意見》中指，「在戴耀廷副教授主持下，根據當時最大公約數的結論，九龍東情況可透過棄選機制方式處理」。趙家賢解釋文章回應公眾關注初選安排，重申3月至5月期間未承辦初選，5月初完成選民登記活動後獲戴區邀請承辦初選，同月中下旬諮詢2位副召集人經考慮過後才答應戴耀廷。趙家賢憶述考慮期間，戴「已經喺一啲協調會議話『我已經邀請咗民主動力幫手喇』」，趙家賢批評戴當時「對人講事實嘅一部份，但係佢冇講民主動力仍在想考慮中未回應」，當時民動總幹事黎敬輝有嘗試在協調會議上交代取態，惟與會者似乎不太重視，之後趙家賢再向戴重申，阻止對方在其他會上如此說道，但「客觀效果會好多人以為民主動力會參加初選⋯⋯造成個認知『哦，民主動力會辦初選啦嘛』」。 

趙續指「當時我要求戴耀廷要承諾整個初選運作民主動力要係可以全權處理同控制，而佢當時口輕輕答應冇問題，我哋當時因為信任佢而同意承辦初選」。趙家賢其後指「之後好多初選流程上嘅變異，我相信之後主控會再帶領我講出來」。李官問到趙家賢當時既非初選一部份，有何必要正式回應？趙家賢答民動自2002年成立本意就在作為民主派協調平台，「而呢個主要民主協調工作由創會召集人2014年交托畀我，我有個使命係繼續將個組織維持運作，有啲傳統民主政黨同支持者都希望民主動力繼續幫手，因而有個使命感」，「坦白講如果之後工作由戴耀廷做晒、獲得授權嘅話，民主動力壽終正寢，唔需要有任何工作」。法官陳仲衡問「你唔想民主動力企埋一邊？」趙家賢同意，李官再問「民動在此明顯缺席，你想看起來像初選其中一部份？」趙家賢同意指「喺個民主運動之中繼續參與」。 

法庭記者：陳子豪

---  

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！  

立即報料: https://bit.ly/3IMunqd

你的獨家報料一旦被採用及報導，將獲得乙份獎品。  

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ