古天后日誌｜港股長線投資價值遠不及美股

3月17日，大致多雲，下午短暫時間有陽光。瑞士央行向瑞信揼水500億瑞郎，大大緩解瑞信流動性問題，歐美銀行股反彈，美股三大指數高收；道指升371點；標指升68點，又重上3900水平；納指則升283點，升幅超過2%。唔覺唔覺納指已回升至2月高位，似乎市場對息口預期有所改變，市場開始炒作聯儲局可時停止加息，甚至結束加息周期，掉頭減息。

經過SVB事件後，各銀行意識到要防範擠提，需要多留現金，幸而爆鑊嘅SVB跟Signature Bank規模唔算大，通過拆骨出售業務，相信唔少銀行會有興趣，滙控(00005)已率先買入SVB UK。美國聯邦存款保險公司(FDIC)擔保SVB及Signature bank，兩者已決定拆骨出售業務，兩者手上有唔少有潛力嘅初創企業客戶，對其他銀行嚟講有一定吸引力，相信問題可順利解決。

雖然目前銀行問題未至於演變成2008年金融海嘯嗰種系統性風險，但喺債息上升債價下跌後，銀行帳目上壞資產增加，暫時雖未至失控，但已亮起警號，一旦繼續加息，更多企業唔掂破產，咁銀行業真係痾膠。SVB事件畀咗聯儲局一個好大警告，目前喺通脹開始受控下，唔應該再進取加息，甚至連出口術放鷹，市場都承受唔起。估計聯儲局喺今年餘下時間，都唔會再進取加息，甚至連放鷹出口術都唔應該，一個唔覺意放咗隻鷹，市場嚇破膽，由無事搞到有事，FOMC就成為股災引爆者。斷估聯儲局唔會蠢到自己做劊子手。

至於通脹係咪真係受控，數字說明一切，美國2月PPI降至4.6%，已經連續7個月下降，以高位計已連續回落10個月，而中國PPI亦從15個月前從高位回落至負數，PPI係領先CPI大約3至5個月時間，從PPI走向估算未來CPI仍然係向下趨勢，只是回落速度快慢問題。未來幾個月嘅通脹數據應有利美聯儲局考慮停止加息，甚至考慮減息。

講嚟講去，古天后就係相信美股唔會出現乜嘢雷曼2.0或者股災，美股係可以逢低吸納，相反港股自去年嘅監管風暴，中港股市嘅政策風險已嚇怕外資，再無外資肯認真坐貨，同北水鬥快短炒，如此一來，港股嘅長線投資價值遠不及美股，炒作只有小打小鬧，近日熱炒股更加有劣幣驅逐良幣之勢。