頭條戲場丨《親陌》陽光下的遍體鱗傷

2023-03-09 08:00

先被電影海報吸引，再為預告沉迷，戲中兩位男童星靚仔又有靈氣，陽光普照下於荷蘭花田奔走，隔住個MON都FEEL到快樂到死。入場後先發現原來講述小男孩的超陰功成長之痛，比利時年輕導演Lukas Dhont對疼痛的描述精準又直插入心，小朋友喊戲感染力超強，後座力估佢唔到，喊到我口罩都濕埋。(上映中) 撰文:廖思慧

導演跟據自己過往的經歷，執導及創作《親陌》。

導演憑《夢女芭蕾》於康城影展一鳴驚人，《親陌》亦再次揚威康城，勇奪評審團大獎兼入圍本屆奧斯卡金像獎最佳國際影及第80屆金球獎最佳非英語影片。連我最欣賞的14歲童星Eden Dambrine亦憑精緻細膩的演技，第一次拍戲就獲得歐洲電影獎最佳男主角提名。

生命中不能拔走的刺

中英文片名都改得非常好，《CLOSE》解親密又得封閉又得，減去C變成LOSE亦可以，而《親陌》完美解讀電影的中心思想，改名嘅係天才。電影表面講親密，其實講疏離。兩位靚到黐線的小男生李奧(Eden Dambrine飾)及洛米(Gustav De Waele飾)，一齊在花田玩，一齊踩單車返學，一齊瞓一齊食，一段好甜的超Close友誼，最鍾意兩人在花海中奔跑，非常自然的親密情感表達，因為同學間的閒言閒語，兩人之間從此有一大片花田的距離。

兩人日日黐到實，一齊踩單車返學，一齊去秘密基地玩遊戲。

李奧晚晚跟洛米一齊瞓，親密到連前者媽媽都問佢，「希望你有一日會返屋企瞓」。

佢係洛米，永遠唔好睇少十幾歲小男生嘅情感，唔好隨意推開佢哋。

洛米(左)及李奧，後者是導演搭火車時發掘，力邀去試鏡。

開場及結尾都是小男生在花海中奔跑，不過開場是兩個人，結尾是一個人。

最喜歡片中所有冇對白的鏡頭，單靠兩位小男生的眼神，已傳遞了無數情感，包含快樂、疑惑、不明白、逞強、後悔及內疚等等，點解年紀輕輕又冇演戲經驗可以演得咁好?特別中後期由二變一，導演非常聰明地選擇以畫面交代李奧的情緒，看似生活重回正軌，但加入大量沉默，連成年人都無法承受的悔恨及悲傷，從李奧雙眼，我完全感受到。極簡單的故事，極細膩的情感，攝影超靚，睇到個心隱隱作痛。