專欄｜利華哈化入球大無有怕

歐洲五大聯賽之中，艾爾比較鍾意睇德甲，因為當地睇波氣氛實在太正喇。每次睇德甲，主場區球迷好多時由頭嗌到尾，嗰種氣氛好似小鳳姐嘅名曲「熱烈地彈琴，熱烈地唱」咁樣。喺另外歐洲四個主流聯賽，係唔會見到呢種咁Hyper嘅環境。艾爾有生之年除咗要去史丹福橋球場朝聖之外，就係要去多蒙特嘅西法倫球場睇波，我覺得嗰度嘅睇波氣氛係全德國最正。

上次推介拜仁慕尼黑對柏林聯嘅賽事，結果主隊輕鬆贏客隊3球，讓球下盤咁就輸咗，真係激死，今次再接再厲，推介多一次德甲賽事。利華古遜季初炒咗瑞士籍教練施安尼後，竟然用上沙比阿朗素執教，呢位踢過皇馬同拜仁嘅少帥過去只係教過皇家蘇斯達二隊，執教經驗非常少。不過，佢主攻嘅打法同利華古遜非常夾，近5場賽事球隊共攻入11球。特別留意19歲嘅德國超新星科利安華迪斯，近5場賽事貢獻入2球3助攻，傷後狀態回勇，係球隊不可或缺嘅「中場發電機」。

利華古遜入得同樣失得，近5場賽事失10球，有3場總入球係5球，水準非常反覆。今次主場對護級心切嘅哈化柏林，可能會上演入球騷，首選入球大細2.5/3球大。艾爾

立即下載 | 全新《星島頭條》APP : https://bit.ly/3yLrgYZ