麥振江專訪｜《警訊》最資深主持TVB藝訓班入行親解「麥警司」暱稱 走勻全港警署直擊寶馬山雙屍案
賀歲電影《毒舌大狀》日前宣佈破紀錄達一億票房，榮登香港史上亞洲及港產片票房No.1，黃子華擔大旗的連場法庭唇槍舌劍戲當然令人睇得過癮，不過其他演員陣容亦令人驚喜。戲中王丹妮因涉及虐兒案而入獄，而判她有罪的原審法官亦大有來頭，他就是曾經主持《警訊》的麥振江！
這位「原審法官」麥振江早前接受《星島頭條》專訪，曾主持《警訊》長達15年的他，多年來被觀眾戲稱為「麥警司」，但其實他並非警務人員出身。麥振在1974年報讀TVB藝訓班，同期同學有周潤發、盧海鵬、鄧英敏、羅冠蘭，以及已故林嶺東和吳孟達等，1979年轉投港台並主持《警訊》，成為有史以來主持時間最長的主持。
麥振江指節目當時在周五晚上9時30分到9時45分播出，緊接播放《歡樂今宵》，能夠在黃金時間播放，實屬罕見。他稱這安排當然一方面希望可以令觀眾提供對案件的資料，同時亦希望可以揭開警隊神秘面紗：「而家當然好簡單，有好多渠道畀人知道『警察是甚麼』，了解部門嘅運作，但係喺70年代，透明度唔係太高，我好相信嗰陣啲人淨係知道發生事要報警，但係未必知道幫辦同警司究竟係點嘅樣。」
「邊度有案件就去嗰度」
麥振江又說：「大家商量過之後，為咗親民啲而唔搵真警察做主持，搵一個唔識警察部啲嘢嘅人做主持，當係市民身份去問，所以用咗普通人去做主持，第一代主持叫葉觀楫，係好出名嘅足球評述員；之後到潘志文，做咗9個月右，因為拍劇太忙冇做，跟住港台搵咗同事麥世亮暫代，之後就搵咗我，1979年開始做主持，點解可以做咁耐？係發覺橫掂都放咗咁多時間落去，而且我又對製作有興趣，於是咪做幕後，自編自導自演，案件重演同短劇都落手落腳。」
雖然節目每集僅15分鐘，但背後付出的功夫一點都不輕鬆：「港九新界同離島，幾乎全香港嘅差館都去過晒，嗰陣喺80年代，主要係報道案件，朝早返工未必係返港台，邊度有案件就去嗰度，同crew（攝製隊）喺警署門口會合，之後要搵負責嗰單case嘅幫辦，傾吓要點樣拍，之後先再去現場。我哋每個禮拜要拍三日外景，平均會去四間差館，經過咁多年，所以咪幾乎乜嘢差館都去過晒，去得最多油麻地同旺角，最少嘅係離島，因為呢啲地方人少，罪案率又唔多，而且我哋出入又要搵水警，所以唔係太特別都未必去，星期四開會同剪片，星期五係埋大版同出街。」
到了90年代，《警訊》開始轉半小時節目，加入《少年警訊》，第一部分是案件重演，第二部分則是針對年青人：「之後就轉型，轉吓另一種做法， 搵藝員同幫辦一齊做主持，第一個係陳玉蓮，跟住好多藝人幫手。」麥振江亦由台前轉戰幕後，偶爾兼任《五稜鏡》、《城市論壇》主持人。
因為主持形象太深入民心，曾經有不少人誤以為麥振江是警察出身，其後更有不少人稱呼他做「麥警司」，他笑說：「其實港台都有好多同事都叫我做『麥警司』，試過有次啱啱做完訪問，臨走嗰陣見到啲同事，佢哋都係咁樣叫我，大家玩吓啫，不過我覺得係學到嘢。」
問到做主持又會否有規限？麥振江說：「冇乜喎，但係形象都唔可以太差，唔可以有太多負面新聞，如果有負面新聞而做警察節目，可能說服力唔夠喎，好似唔係咁好喎，甚至節目形式亦冇掣肘，對我哋好放心，佢畀資料我哋，拍就係我哋港台同事去拍，以最好為原則，但係有啲嘢係唔講得，好似係警察部嘅policy，爭議性嘅嘢同政策唔會講。」
81年直擊大麻場案畫面震撼
歷年來麥振江都曾經處理過不少「案件」，問到當中的難忘事，他坦言有很多：「寶馬山雙屍案 ，有兩個外籍男女畀人謀殺，嗰陣係八幾年嘅事，啲通訊器材唔似而家咁方面，一個電話就知，嗰陣係由call機開始，因為每一次外景都有幫辦，如果外景call機響，就好大件事，一定有嘢會發生。」
麥振江續說：「嗰次收call話有人死咗，我哋又喺北角咪一齊行過去，上到去佢哋封咗好多路，本來埋唔去到，於是咪行去對面個山報道事件，雖然我哋係最快兼且又係第一手報道，但我哋唔係直播，要返去剪片，但係都睇到佢哋入現場。」
其次當然是「大麻場」事件：「 嗰陣係1981年，又係拍拍吓嘢call機響，話西貢張公山發現有大麻場， 本來我哋拍緊其他外景，都一齊去拍，去到現場環境好偏，啲器材又重，成隊人行咗成個鐘先到，上到去見到全部係泥地，種植得好整齊，嗰陣拍晒咪訪問咗個毒品調查科嘅幫辦，解釋吓情況同呼籲，過咗一段時間，同警務處長拍啲賀詞，一哥同我講開，問我會唔會仲有八幾年有單西貢大麻場嗰啲訪問片仲喺唔喺度？當時我只係話要返去搵，點知一哥話『我就係接受訪問嗰個幫辦』，佢就係曾偉雄 。」
獲前一哥頒贈警務人員獎狀
正因為麥振江擔任《警訊》主持十五年，是任期最長的一位，與7位一哥交手，包括洋人警務處長顏理國、首位華人警務處長李君夏、後來的許淇安、曾蔭培、李明逵、鄧竟成和曾偉雄，他更獲前一哥顏理國頒贈警務人員獎狀，而這獎狀平日只授予破案警員，非常罕有。
現時的麥振江已經退下火線，今次獲邀客串《毒舌大狀》，麥振江粉墨登場飾演法官：「我諗過點解搵我做，可能我形象有說服力，係正直，我自己都做得開心，對我係一個新體驗，睇到好多演員都好認真去做，而家同以前嘅拍攝機器都唔同，當然如果係奸角又或者黑幫，我就未必做。」
攝影：羅安強
場地提供：Harlan's (The ONE)
【其他文章】：
黎耀祥老婆激罕短褲look晒白滑美腿有肌肉線條fit爆 唔使開工最愛行超市買餸
菊梓喬炸傷耳返港新相鼻樑忽然筆直？再「進化」嚇親網民：完全認唔出
「寵妻狂」陳豪送陳茵媺逾200萬Hermès袋 曾送炒價30萬限量版情人節再送大橙盒：My Forever Valentine
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應