麦振江专访｜《警讯》最资深主持TVB艺训班入行亲解「麦警司」昵称 走匀全港警署直击宝马山双尸案
贺岁电影《毒舌大状》日前宣布破纪录达一亿票房，荣登香港史上亚洲及港产片票房No.1，黄子华担大旗的连场法庭唇枪舌剑戏当然令人睇得过瘾，不过其他演员阵容亦令人惊喜。戏中王丹妮因涉及虐儿案而入狱，而判她有罪的原审法官亦大有来头，他就是曾经主持《警讯》的麦振江！
这位「原审法官」麦振江早前接受《星岛头条》专访，曾主持《警讯》长达15年的他，多年来被观众戏称为「麦警司」，但其实他并非警务人员出身。麦振在1974年报读TVB艺训班，同期同学有周润发、卢海鹏、邓英敏、罗冠兰，以及已故林岭东和吴孟达等，1979年转投港台并主持《警讯》，成为有史以来主持时间最长的主持。
麦振江指节目当时在周五晚上9时30分到9时45分播出，紧接播放《欢乐今宵》，能够在黄金时间播放，实属罕见。他称这安排当然一方面希望可以令观众提供对案件的资料，同时亦希望可以揭开警队神秘面纱：「而家当然好简单，有好多渠道畀人知道『警察是甚么』，了解部门嘅运作，但系喺70年代，透明度唔系太高，我好相信嗰阵啲人净系知道发生事要报警，但系未必知道帮办同警司究竟系点嘅样。」
「边度有案件就去嗰度」
麦振江又说：「大家商量过之后，为咗亲民啲而唔搵真警察做主持，搵一个唔识警察部啲嘢嘅人做主持，当系市民身份去问，所以用咗普通人去做主持，第一代主持叫叶观楫，系好出名嘅足球评述员；之后到潘志文，做咗9个月右，因为拍剧太忙冇做，跟住港台搵咗同事麦世亮暂代，之后就搵咗我，1979年开始做主持，点解可以做咁耐？系发觉横掂都放咗咁多时间落去，而且我又对制作有兴趣，于是咪做幕后，自编自导自演，案件重演同短剧都落手落脚。」
虽然节目每集仅15分钟，但背后付出的功夫一点都不轻松：「港九新界同离岛，几乎全香港嘅差馆都去过晒，嗰阵喺80年代，主要系报道案件，朝早返工未必系返港台，边度有案件就去嗰度，同crew（摄制队）喺警署门口会合，之后要搵负责嗰单case嘅帮办，倾吓要点样拍，之后先再去现场。我哋每个礼拜要拍三日外景，平均会去四间差馆，经过咁多年，所以咪几乎乜嘢差馆都去过晒，去得最多油麻地同旺角，最少嘅系离岛，因为呢啲地方人少，罪案率又唔多，而且我哋出入又要搵水警，所以唔系太特别都未必去，星期四开会同剪片，星期五系埋大版同出街。」
到了90年代，《警讯》开始转半小时节目，加入《少年警讯》，第一部分是案件重演，第二部分则是针对年青人：「之后就转型，转吓另一种做法， 搵艺员同帮办一齐做主持，第一个系陈玉莲，跟住好多艺人帮手。」麦振江亦由台前转战幕后，偶尔兼任《五棱镜》、《城市论坛》主持人。
因为主持形象太深入民心，曾经有不少人误以为麦振江是警察出身，其后更有不少人称呼他做「麦警司」，他笑说：「其实港台都有好多同事都叫我做『麦警司』，试过有次啱啱做完访问，临走嗰阵见到啲同事，佢哋都系咁样叫我，大家玩吓啫，不过我觉得系学到嘢。」
问到做主持又会否有规限？麦振江说：「冇乜喎，但系形象都唔可以太差，唔可以有太多负面新闻，如果有负面新闻而做警察节目，可能说服力唔够喎，好似唔系咁好喎，甚至节目形式亦冇掣肘，对我哋好放心，佢畀资料我哋，拍就系我哋港台同事去拍，以最好为原则，但系有啲嘢系唔讲得，好似系警察部嘅policy，争议性嘅嘢同政策唔会讲。」
81年直击大麻场案画面震撼
历年来麦振江都曾经处理过不少「案件」，问到当中的难忘事，他坦言有很多：「宝马山双尸案 ，有两个外籍男女畀人谋杀，嗰阵系八几年嘅事，啲通讯器材唔似而家咁方面，一个电话就知，嗰阵系由call机开始，因为每一次外景都有帮办，如果外景call机响，就好大件事，一定有嘢会发生。」
麦振江续说：「嗰次收call话有人死咗，我哋又喺北角咪一齐行过去，上到去佢哋封咗好多路，本来埋唔去到，于是咪行去对面个山报道事件，虽然我哋系最快兼且又系第一手报道，但我哋唔系直播，要返去剪片，但系都睇到佢哋入现场。」
其次当然是「大麻场」事件：「 嗰阵系1981年，又系拍拍吓嘢call机响，话西贡张公山发现有大麻场， 本来我哋拍紧其他外景，都一齐去拍，去到现场环境好偏，啲器材又重，成队人行咗成个钟先到，上到去见到全部系泥地，种植得好整齐，嗰阵拍晒咪访问咗个毒品调查科嘅帮办，解释吓情况同呼吁，过咗一段时间，同警务处长拍啲贺词，一哥同我讲开，问我会唔会仲有八几年有单西贡大麻场嗰啲访问片仲喺唔喺度？当时我只系话要返去搵，点知一哥话『我就系接受访问嗰个帮办』，佢就系曾伟雄 。」
获前一哥颁赠警务人员奖状
正因为麦振江担任《警讯》主持十五年，是任期最长的一位，与7位一哥交手，包括洋人警务处长颜理国、首位华人警务处长李君夏、后来的许淇安、曾荫培、李明逵、邓竟成和曾伟雄，他更获前一哥颜理国颁赠警务人员奖状，而这奖状平日只授予破案警员，非常罕有。
现时的麦振江已经退下火线，今次获邀客串《毒舌大状》，麦振江粉墨登场饰演法官：「我谂过点解搵我做，可能我形象有说服力，系正直，我自己都做得开心，对我系一个新体验，睇到好多演员都好认真去做，而家同以前嘅拍摄机器都唔同，当然如果系奸角又或者黑帮，我就未必做。」
摄影：罗安强
场地提供：Harlan's (The ONE)
【其他文章】：
黎耀祥老婆激罕短裤look晒白滑美腿有肌肉线条fit爆 唔使开工最爱行超市买餸
菊梓乔炸伤耳返港新相鼻梁忽然笔直？再「进化」吓亲网民：完全认唔出
「宠妻狂」陈豪送陈茵媺逾200万Hermès袋 曾送炒价30万限量版情人节再送大橙盒：My Forever Valentine
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应