古天后日誌｜耐心靜待大市回補裂口捕捉買貨機會

2月17日，大致天晴，天氣乾燥，早上清涼，周末期間回復溫暖。隔晚美股繼續反覆，尾市又有聯儲局官員放鷹，表示3月議息會議或支持加息0.5%，令美股全線走低，三大指數跌逾1%，當中標指更跌穿4100嘅短線支持位。標指一旦真正失守4100水平，短線或再向3900水平尋找支持。目前美股處於日跌日升嘅反覆狀態，主要係通脹回落速度不似預期，即使市場氣氛唔係太差，投資者情緒偏向高漲，但每當聯儲局發表偏鷹言論，美股必然打冷震，睇嚟短期美股仍難擺脫反覆局面。

本來美股自去年10月低位反彈，一直係靠市場憧憬息口將回落，FOMC或扭轉緊縮貨幣政策，但從近日嘅經濟數據反映，通脹回落速度不似預期，即係之前市場憧憬嘅貨幣政策逆轉預期落空。尤其係PPI回升，將會令CPI亦回升，若然未來幾個月PPI保持喺5%之上，CPI只會橫行甚至回升，遠遠未能達到聯儲局2%嘅通脹目標，FOMC亦難以將貨幣政策扭轉，甚至有需要繼續加息，喺咁嘅情況下，美股有機會由反覆轉為下跌，呢點係持倉較重者要小心。留意10年美債息已回升至3.87%，一旦重上3.9%並企穩，高增長股即係科技股，生科股等，將因為息率回升而再被拋售。

至於港股噚日一度反彈至10日線水平，但午後升幅大大收窄，10日線得而復失，走勢上係調整未完成，目前受制10日線，20日線更加唔使講，短線呢兩條線未能收復嘅話，港股調整之勢未成。留意本周兩度於20800水平獲得支持而靠穩，若然20800失守，大市定必向住50日線及250日線出發，暫時兩者分別處於20704及20076，而古天后傾向大市將回補20200上升裂口，留意20000至20200將會係大市完成調整，再度回升嘅關鍵。

個股方面，有意喺二萬水平建倉，都係集中火力重磅科技股，指數重磅股，ATMJ，百度(09888)、港交所(00388)等，至於生科股則留意信達生物(01801)及康方生物(09926)，呢啲都會係購物名單首選。